Umfjöllun: Skemmtilegt jöfnunarmark Halldórs Orra

Leik Keflvíkinga og Stjörnunnar lauk með 2-2 jafntefli í Keflavík í kvöld. Með þessu halda bæði liðin sætum sínum í 5. og 6. sæti í Pepsi-deildinni.

Leikurinn hófst afar fjörlega, fyrsta mark kom eftir aðeins 65 sekúndur og var þar að verki Hörður Sveinsson eftir góða fyrirgjöf frá Matthíasi Þóri Matthíassyni. Boltinn kom inn af hægri kanti og var Hörður einn og óvaldaður og stýrði boltanum glæsilega í fjærhornið, óverjandi fyrir Bjarna Þórð Halldórsson í marki Stjörnunnar.

Stjörnumenn voru þó ekki lengi að jafna, á 9. Mínútu leiksins skoraði Arnar Már Björgvinsson jöfnunarmark þeirra. Atli Jóhannsson átti þá góða sendingu inn fyrir vörn Keflavíkur og voru þar tveir Stjörnumenn einir gegn Lasse Jörgensen í marki Keflavíkur. Arnar tók boltann og setti hann undir Lasse en hinsvegar var spurning hvort þeir hafi verið rangstæðir.

Eftir þetta fjaraði leikurinn að mestu út en Keflvíkingar voru þó hættulegri og hefðu getað bætt við.

Hörður Sveinsson náði svo aftur forystunni eftir aðeins sjö mínútur í seinni hálfleik, þá kom fyrirgjöfin af vinstri kanti sem Hörður skaut úr en Bjarni varði. Hinsvegar fylgdi Hörður eftir af harðfylgi og náði að pota tánni í boltann og setja hann yfir línuna.

Stjarnan náði hinsvegar aftur að jafna og var þar að verki Halldór Orri Björnsson,  hann átti fyrirgjöf miðaða á Garðar Jóhannesson sem var nýkominn inn af varamannabekk Stjörnunnar. Garðar hitti ekki boltann en það kom ekki að sök, boltinn lak afar hægt í stöngina og inn og verður þetta alfarið að skrifast á Lasse.

Eftir þetta reyndu bæði lið að kreista fram sigur og fengu Keflvíkingar ágætis færi til þess en náðu ekki að nýta sér það og lauk leiknum því 2-2.

Keflavík - Stjarnan 2-2

1-0 Hörður Sveinsson (2.)

1-1 Arnar Már Björgvinsson (9.)

2-1 Hörður Sveinsson (52.)

2-2 Halldór Orri Björnsson (80.)

Áhorfendur: 970

Dómari: Guðmundur Ársæll Guðmundsson 6

Skot (á mark): 15-11  (7-3)

Varin skot: Lasse 0 – Bjarni Þórður 5

Horn: 10-2

Aukaspyrnur fengnar: 11-7

Rangstöður: 2-2

Keflavík (4-5-1):

Lasse Jörgensen 4

Guðjón Árni Antoníusson 5

Haraldur Freyr Guðmundsson 6

Bjarni Hólm Aðalsteinsson 6

Alen Sutej 5

Magnús Sverrir Þorsteinsson 6

(85. Jóhann Birnir Guðmundsson -)

Hólmar Örn Rúnarsson 6

Einar Orri Einarsson 7

Guðmundur Steinarsson 5

Magnús Þórir Matthíasson 5

(85. Haukur Ingi Guðnason -)

Hörður Sveinsson 7 – maður leiksins

Stjarnan (4-5-1):

Bjarni Þórður Halldórsson 6

Bjarki Páll Eysteinsson 5

Tryggvi Sveinn Bjarnason 7

Daníel Laxdal 6

Jóhann Laxdal 5

Atli Jóhannsson 5

Björn Pálsson 6

Arnar Már Björgvinsson 6

(77. Hilmar Þór Hilmarsson -)

Halldór Orri Björnsson 7

Þorvaldur Árnason 4

(70. Garðar Jóhannsson 6)

Ólafur Karl Finsen 5

Leiknum var lýst beint á Boltavakt Vísis og Fréttablaðsins. Til þess að fylgjast með lýsingunni þarf að smella hér: Keflavík - Stjarnan.