Maðurinn ófundinn - þyrla kölluð út

Gangnamaðurinn sem saknað hefur verið við Hrossafell síðan í morgun er ófundinn. Þyrla Landhelgisgæslunnar hefur verið kölluð út vegna leitarinnar. Þá eru leitarhundar komnir á svæðið, að sögn Höskuldar Erlingssonar, varðstjóra hjá lögreglunni á Blönduósi. Þyrlan er útbúin hitamyndavél sem vonast er til að komi að góðum notum við leitina.

Björgunarsveitir úr Skagafirði og Húnavatnssýslu hafa leitað mannsins, sem er á fimmtugsaldri, frá því í dag. Gangnmaðurinn var við leitir þegar hann missti frá sér hest þannig að hann þurfti að fara á eftir honum. Um klukkan 10 í morgun náðist samband við manninn. Hann hafði þá náð hesti sínum og var sagt að koma í Kambadal og hitta félaga sína. Síðan hefur ekkert til hans spurst en maðurinn er lítt kunnugur á svæðinu.

Um 50 björgunarsveitarmenn taka nú þátt í leitinni en þokusuddi gerir leitarmönnum erfitt fyrir. Höskuldur segir að fleiri björgunarsveitarmenn séu í startholunum.