Segja Catalinu seka um mansal

Vitnisburðir kvenna vegna rannsóknar lögreglu á meintri vændisstarfsemi Catalinu Ncoco benda til þess að hún hafi gerst sek um mansal gagnvart sumum þeirra, sem bera að hún hafi selt þær í vændi. Hún hafi beitt ótilhlýðilegri aðferð, ofbeldi, hótunum um ofbeldi og frelsissviptingu gegn konunum. Hæstiréttur framlengdi í gær gæsluvarðhald yfir Catalinu til 23. apríl.

Við rannsókn málsins hafa konur borið að þær hafi stundað vændi hér á landi á vegum hennar og að þær hafi komið til landsins í því skyni að starfa við vændi á vegum Catalinu. Konunum ber saman um að hún hafi verið umráðamanneskja þess húsnæðis þar sem þær dvöldu og vændið verið stundað. Hún hafi haft alla milligöngu við þá sem keypt hafi vændisþjónustu þeirra, tekið við greiðslu og haldið eftir verulegum hluta þess sem greitt var.

Auk framburða brotaþola og vitna styðja ýmis gögn sakarefnin á hendur Catalinu. Þá bárust lögreglustjóranum á höfuðborgarsvæðinu upplýsingar um að Catalina hafi boðið samfanga sínum, ungri konu, að starfa fyrir sig sem vændiskona fyrir 500.000 krónur á mánuði þegar hún væri laus úr fangelsi. Þetta staðfesti konan og vitni við lögreglu.- jss