Þráinn: Einvaldurinn á RÚV í stríð við kvikmyndagerðarmenn

Þráinn Bertelsson þingmaður bar upp fyrirspurn til menntamálaráðherra í dag um málefni Ríkisútvarpsins. Hann sagði að allt væri upp í loft hjá stofnuninni, þar færu menn fram úr fjárheimildum trekk í trekk og „nú síðast hefur sá einvaldur sem ráðinn hefur verið til að stjórna þessari stofnun hafið stríð við íslenska kvikmyndagerðarmenn - með því að gera þá að barefli í stríðinu við stjórnvöld," sagði Þráinn.

Að hans mati á RÚV að vera einn af hornsteinum íslenskrar kvikmyndagerðar. „Svo er ekki núna og íslensk kvikmyndagerð hefur orðið að þola af okkur þann ósvífnasta og óréttlátasta niðurskurð á þessum niðurskurðartímum sem við lifum." Þráinn sagði að kvikmyndagerðarmenn þurfi ekki á því að halda að verða fuyrir árásum af hálfu RÚV og spurði hann menntamálaráðherra hvaða stefnu frá eigenda fyrirtækisins nýkjörin stjórn eigi að framfylgja, „eða á stjórnin að leilka af fingrum fram?"

Katrín Jakobsdóttir svaraði því meðal annars til að RÚV hafi notað 175 milljónir króna á síðasta ári til kaupa á efni af sjálfstæðum framhleiðindum. 108 milljónir hafi farið til kaupa á titlum en afgangurinn í talsetningu, þá aðallega barnaefni. Hún sagðist einnig hafa óskað eftir fundi með nýrri stjórn RÚV sem kjörin var í dag.