Andri : Við fundum nasaþefinn af sigrinum.

Andri Marteinsson, þjálfari Hauka, var að vonum svekktur eftir að lið hans tapaði niður 1-0 forskoti á 86. mínútu gegn Keflavík í kvöld en liðið var þá við það að vinna sinn fyrsta sigur í sumar.

„Það er mjög sárt að tapa þessu svona. Við fundum nasaþefinn af því að landa sigri. Við höfum oft verið sjálfum okkur verstir en núna var ekkert slíkt í gangi, við náðum að setja mark á þá og halda okkur þéttum," sagði Andri.

Mark Keflvíkinga var afar skrautlegt, en það skoraði Magnús Þórir Matthíasson þegar hann náði að skjóta úr afar þröngu færi og lauma boltanum framhjá Daða Lárussyni í marki Hauka.

„Markið kemur úr engu, því er þetta mjög svekkjandi. Lukkudísirnar hljóta þó að fara að koma á okkar hlið, við höfum haft mikið fyrir þessu en þetta getur ekki haldið áfram að vera svona slysalegt," sagði Andri.

Erfiðar aðstæður voru á Njarðtaksvelli, völlurinn var afar blautur og mikill vindur og var því oft erfitt að koma góðu spili á.

„Við spiluðum vel úr þessum aðstæðum, það var mjög góður bolti spilaður oft á köflum," sagði Andri.

Haukarnir eru enn sigurlausir en eru þó með þrjú stig við botninn, en þeir voru þó nálægt því að ná sigri í þetta sinn.

„Spilið okkar hefur verið að lagast og við höfum verið að spila vel síðustu þrjá leiki. Það eru alltaf jákvæðir punktar sem við getum tekið með okkur. Við þurfum þó að fara að spýta aðeins meira í lófana til að láta gæfuna snúast okkur í hag. Ekki alltaf vera að taka jákvæða punkta úr leikjum sem tapast eða gerum jafntefli í, " sagði Andri.