Noble ekki meira með á árinu

Ekkert virðist ganga West Ham í hag þessa dagana. Nú hefur verið greint frá því að Mark Noble verði frá keppni þar til á nýju ári vegna meiðsla.

Noble fékk botnlangakast fyrr í mánuðinum og þurfti að fara í aðgerð vegna þess. Hann náði leiknum gegn Liverpool um síðustu helgi en varð fyrir meiðslum í þeim leik. Enn er óljóst hversu lengi hann verður frá en vonast er til að hann geti byrjað að spila á ný snemma í janúar.

West Ham mætir Wigan um helgina í gríðarlega mikilvægum leik í botnbaráttunni. West Ham er sem stendur í neðsta sæti ensku úrvalsdeildarinnar með níu stig, fimm stigum frá öruggu sæti.

Avram Grant á því í miklum vandræðum á miðjunni þar sem að Thomas Hitzlsperger og Jack Collison eru meiddir en þeir hafa ekkert spilað á leiktíðinni. Scott Parker hefur einnig verið frá vegna veikinda en vonir eru bundnar við að hann verði orðinn klár í slaginn á morgun.