Hafna fyrirhuguðum breytingum

Hundruð þúsunda manna mótmæltu áætlunum stjórnvalda um hækkun eftirlaunaaldurs í borgum Frakklands í dag. Víðtæk verkföll gætu leitt til eldsneytisskorts sem truflað gæti flugumferð í landinu. Trúnaðarmaður stálverkamanna hafnar breytingunum og segir að þær verði að taka mið á mun fleiri þáttum.

Hundruð þúsunda manna héldu út á götur helstu borga Frakklands í dag eins og París, Toulouse og Lyon til að mótmæla áformum ríkisstjórnar Nicolasar Sarkozy Frakklandsforseta um að hækka eftirlaunaaldur úr 60 árum í 62 ár. Þá hefur fjöldi stéttarfélaga verið í verkföllum og hafa boðað verkföll vegna þessa. Stjórnvöld segja nauðsynlegt að hækka eftirlaunaaldurinn vegna þess að franska þjóðin sé að eldast og vegna gífurlegs halla á eftirlaunasjóðum landsins.

„Við höfnum þessum breytingum á eftirlaunakerfinu. Við viljum umbætur sem taka mið af öllum þáttum, t.d. hversu erfið vinna manns er líkamlega. Í verskmiðju okkar eru menn sem starfa í málmsteypusmiðjunni og því miður eru lífslíkur þeirra stuttar. Það er dapurlegt að þeir geti ekki nýtt sér það að fara fyrr á eftirlaun, jafnvel nú þegar eftirlaunaaldurinn er 60 ár. Við viljum skoða það að fara á eftirlaun við 55 ára aldur," segir Alain Audier, trúnaðarmaður stálverkamanna.