Julian Assange neyðist til að skrifa bók

Julian Assange, forsvarsmaður uppljóstrunarsíðunnar Wikileaks, hefur skrifað undir samning um útgáfu bókar sem færir honum eina milljóna punda eða jafnvirði tæplega 117 milljóna íslenskra króna.

Í viðtali við breska dagblaðið Sunday Times segist Assange ekki hafa langað til að skrifa bók á þessum tímapunkti en að hann hafi neyðst til þess. Þá fjármuni sem Assange fær fyrir útgáfusamninginn hyggst hann nota til að greiða lögfræðingum sínum vegna málaferla í Bretlandi og Svíþjóð. Það er bókafélagið Random House sem gefur bókina út en hún kemur væntanlega út á næsta ári. Þá er einnig von á bókum frá fyrrverandi félagum Assange hjá Wikileaks.

Assange stofnaði Wikileaks árið 2006 sem vettvang fyrir uppljóstrara sem vilja koma á framfæri leynigögnum. Honum var sleppt úr fangelsi í Bretlandi um miðjan mánuðinn en Assange hafði þá verið í fangelsi í rúma viku vegna framsalskröfu frá Svíþjóð, þar sem hann er sakaður um kynferðisbrot gegn tveimur konum. Assange óttast að ef hann verði framseldur til Svíþjóðar verði það í raun aðeins millilending á leið til Bandaríkjanna en þar hafa stjórnmálamenn lagt til að hann yrði ráðinn af dögum.