Ísafjörður: Framsókn vill auglýsa embætti bæjarstjóra

Framsóknarmenn í Ísafjarðarbæ setja það sem skilyrði fyrir áframhaldandi meirihlutasamstarfi með sjálfstæðismönnum að starf bæjarstjóra verði auglýst, að sögn Albertínu Elíasdóttur, bæjarfulltrúa Framsóknarflokksins. Fulltrúar flokkanna hittust í gær til að ræða framhaldið og er ákveðið að þeir hittist aftur síðdegis í dag.

Sjálfstæðismenn buðu fram oddvita sinn, Eirík Finn Greipsson, sem bæjarstjóraefni, og ætluðu honum þannig að taka sess Halldórs Halldórssonar, sem á nýliðnu kjörtímabili var bæði bæjarstjóri og oddviti sjálfstæðismanna.

Albertína segir þreifingarnar við sjálfstæðismenn á viðkvæmu stigi og segir óljóst hvernig þeim reiðir af. Albertína kveðst einnig hafa rætt við Sigurð Pétursson, oddvita Í-listans, í gær og hún muni væntanlega ræða meira við hann. Framsóknarflokkur er í oddaaðstöðu í Ísafjarðarbæ með einn bæjarfulltrúa en D-listi og Í-listi hafa fjóra fulltrúa hvor.