Þjálfari Fluminense fékk ekki leyfi til að þjálfa Brasilíu

Muricy Ramalho, þjálfari Fluminense, fékk ekki leyfi frá félaginu sínu til þess að taka við brasilíska landsliðinu og í staðinn hefur Mano Menezes, þjálfara Corinthians verið boðið starfið í staðinn.

Dunga hætti með brasilíska landsliðið eftir að liðið datt út úr átta liða úrslitunum á HM í Suður-Afríku. Það er mikið kappsmál að þjálfa Brasilíu næstu fjögur árin því Brasilíumenn verða á heimavelli á HM 2014 í fyrsta skipti síðan 1950.

Menezes er 48 ára gamall og hefur þjálfað lið Corinthians frá árinu 2008. Hann ætlar að tilkynna ákvörðun sína á blaðamannafundi í Sao Paulo í dag en allar líkur er á því að hann taki að sér starfið.