Landsliðshópur Sigurðar: Kristín Ýr valin

Kristín Ýr Bjarnadóttir er í íslenska landsliðshópnum sem mætir Frakklandi í úrslitaleik um laust sæti á HM á laugardaginn. Kristín hefur gagnrýnt landsliðsþjálfarann Sigurð Ragnar Eyjólfsson opinberlega fyrir að velja sig ekki í hópinn, síðast í gær.

Það gerði hún í viðtali á heimasíðunni Fótbolti.net þar sem hún sagði Sigurð ekki hafa trú á sér. Það afsannar Sigurður í dag.

Ísland mætir Frökkum á laugardag og Eistum úti 25. ágúst. Ísland þarf að vinna Frakka 3-0 til að komast upp fyrir þjóðina í efsta sæti riðilsins.

Frakkar unnu fyrri leikinn 2-0 og eru þess utan með mun betri markatölu.

Harpa, Fanndís, Thelma og Kristín Ýr koma inn í hópinn en Katrín Ómarsdóttir er meidd. Harpa fótbrotnaði skömmu fyrir EM 2009 en valin aftur núna líkt og Fanndís sem var síðast í liðinu í vor.