Lögmaður Styrmis: Haldlaus ákæra

Ragnar H. Hall, lögmaður Styrmis Þórs Bragasonar, telur ákæru á hendur honum haldlausa, en Styrmir er ákærður fyrir hlutdeild í meintum umboðssvikum Ragnars Zophoníasar Guðjónssonar, sparissjóðsstjóra Byrs og Jóns Þorsteins Jónssonar, fyrrverandi stjórnarformanns sparisjóðsins.

Eins og fréttastofa greindi frá í gærkvöldi fyrst fjölmiðla hefur sérstakur saksóknari gefið út sínar fyrstu ákærur, en Jón Þorsteinn Jónsson, fyrrverandi stjórnarformaður Byrs og Ragnar Zophonías Guðjónsson fyrrverandi sparisjóðsstjóri, eru ákærðir fyrir umboðssvik vegna 1,1 milljarðs króna láns sem Byr veitti félaginu Exeter Holding í tveimur hlutum eftir bankahrunið haustið 2008. Styrmir Þór Bragason er sá þriðji sem er ákærður, en hann er ákærður fyrir hlutdeild í meintu broti þeirra Jóns Þorsteins og Ragnars. Umboðssvik eru hegningarlagabrot og varða allt að tveggja ára fangelsi en allt að sex ára fangelsi ef sakir eru mjög miklar.

Lánveitingin til Exeter Holding er talin hafa valdið Byr sparisjóði miklu fjárhagslegu tjóni, en peningarnir voru nýttir til að kaupa stofnfjárbréf í Byr af MP banka, áðurnefndum Jóni Þorsteini og Birgi Ómari Haraldssyni, fyrrverandi stjórnarmanni í sparisjóðnum. MP banki hafði eignast bréfin eftir veðkall á félagið Húnahorn, sem var í eigu Ragnars sparisjóðsstjóra og nokkurra annarra stjórnenda Byrs. Bankinn eignaðist bréfin eftir að Húnahorn gat ekki veitt fullnægjandi tryggingar þegar stofnfjárbréfin lækkuðu í verði, en MP banki hafði veitt félaginu lán til að fjármagna kaupin á stofnfjárbréfunum.

Ragnar H. Hall, hæstaréttarlögmaður, gætir hagsmuna Styrmis Þórs Bragasonar í málinu. Ragnar segir ákæru á hendur Styrmi haldlausa. Hann segist ekki ætla að reka málið í fjölmiðlum, en segir að háttsemi Styrmis hafi falist í því að selja stofnfjárbréf og taka við greiðslu fyrir hönd MP banka. Sala á stofnfjárbréfum og móttaka greiðslu sé ekki refsiverð háttsemi samkvæmt íslenskum lögum.

Fréttastofa náði í gær tali af Jóni Þorsteini Jónssyni, en hann var þá nýlentur í Keflavík. Hann hafði ekki fengið ákæru á hendur sér birta og kom því af fjöllum og vildi ekkert tjá sig um málið.

Rannsókn málsins er nú lokið hjá sérstökum saksóknara. Alls voru fjórtán einstaklingar grunaðir undir rekstri málsins, en ellefu hafa nú fengið bréf um að rannsókn sé lokið og að ekki verði gefin út áæra á hendur þeim. Á meðal þeirra er Auður Arna Eiríksdóttir, fyrrverandi útibússtjóri Byrs og áðurnefndur Birgir Ómar Haraldsson.

Ákærur á hendur þremenningunum, Ragnari, Jóni Þorsteini og Styrmi, verða þingfestar á næstu vikum í Héraðsdómi Reykjavíkur. Að sögn Ólafs Þórs Haukssonar, sérstaks saksóknara, eru nokkur önnur mál komin langt hjá embættinu, en hann treystir sér ekki til þess að svara hvenær rannsóknum í þessum málum ljúki.