Efast um að mjólkurhristingur bæti sjónina

Fjöldinn allur af fullyrðingum hellist yfir þjóðina, margar þeirra eru þó óleyfilegar. Þetta segir prófessor í matvæla- næringarfræði við Háskóla Íslands og kallar eftir viðbörgðum eftirlitsaðila.

Nú er hægt að fá sérstakan engiferdrykk á Íslandi sem sagður er virka vel á ýmsa kvilla, svo sem gigt, astma, mígreni, tíðaverki, flensu, hálsbólgu, sykurfíkn, bólgur, sogæðakerfið og ýmis húðvandamál. En þar með eru kostirnir ekki upptaldir, drykkurinn er einnig sagður auka brennslu og stuðla að heilbrigðum meltingarvegi. Þá er fullyrt í ísbúð á höfuðborgarsvæðinu að þar sé seldur ís sem bæði getur lækkað kólestról og í annarri ísbúð er hægt að fá mjólkurhristing sem bætir sjónina.

Ingibjörg Gunnarsdóttir, prófessor í matvæla- og næringarfræðideild Háskóla Íslands, veltir því fyrir sér hvers vegna það er látið viðgangast að auglýsendur fullyrði svona um vörur sínar.

„Því miður þykir mér alltof mikið um að fullyrt sé um tengsl matvæla og heilsu án þess að fyrir því liggi vísindalegur grunnur og staðfestar kenningar," segir Ingibjörg.

Hún segir þessa reglugerð hafa verið setta til að vernda neytendur.

Að sögn Ingibjargar hafa ósannaðar fullyrðingar verið óleyfilegar nema framleiðendur hefðu fengið sérstakt leyfi frá Matvælastofnun. Þetta hafi breyst í apríl á þessu ári þegar ný reglugerð frá Evrópusambandinu tók gildi. Sú reglugerð veit svigrúm til fullyrðinga að því gefnu að þær séu studdar vísindalegum rannsóknum sem sýni fram á þá virkni sem fullyrt er um. Fullyrðingarnar verði svo á vera á sérstökum lista sambandsins. Hún þorir þó að fullyrða að engin af þeim fullyrðingum sem hafa verið taldar upp í þessari umfjöllun sé á þeim lista. Í aðsendri grein í Morgunblaðinu í dag spyr Ingibjörg hver ætli að stöðva þessa vitleysu.

„Ég er líka að biðla til framleiðanda og innflytjenda um að sýna neytendum smá vott af virðingu og fullyrða ekki um heilsufar áhrif sem ekki hafa verið staðfest með rannsókn," segir Ingibjörg að lokum.