Forseti Íslands hefur ákveðið hvort hann staðfestir eða synjar Icesave lögunum staðfestingar og greinir frá þeirri ákvörðun í fyrramálið. Töluverðar líkur eru á að ríkisstjórnin segi af sér og boðað verði til kosninga, synji forsetinn því að staðfesta lögin.

Fjórir dagar eru liðnir frá því forseti Íslands fékk Icesave lögin í hendur frá Alþingi. Segja má að forsetinn hafi líf ríkisstjórnarinnar í hendi sér, því töluverðar líkur eru á að stjórnin segi af sér synji forsetinn því að staðfesta lögin.

Því geri forsetinn það blasir við ríkisstjórninni að fara í þjóðaratkvæðagreiðslu um Icesave sem kallar á kosningabaráttu um það mál í sex til tíu vikur. Á meðan myndi varla vera vinnufriður á Alþingi og ríkisstjórnin hefur líka sagt að Icesave lögin séu stór hluti af endurreisn efnahagslífsins samkvæmt hennar áætlunum.

Allar líkur eru á að stjórnin tapaði Icesave málinu í kosningum og því alveg eins líklegt að forystumenn hennar telji heppilegra að fara í almennar Alþingiskosningar. Í þeim kosningum yrði afstaða flokka í þessu máli eitt aðal kosningamálið.

Forseti getur skipað utanþingsstjórn

Útilokað má telja að Samfylking eða Vinstri grænir færu í stjórn með Sjálfstæðisflokki fyrir kosningar en án aðkomu hans er ekki hægt að mynda ríkisstjórn án annars stjórnarflokkanna. Forseti getur tæknilega skipað utanþingsstjórn en hún þyrfti líka að ná í umboð sitt til núverandi þings, þannig að kosningar væru sennilegasta útkoman.

Forsetinn fundaði með formönnum stjórnarflokkanna í gær og þar hafa þeir væntanlega greint forseta frá mati sínu á stöðu mála, synji hann lögunum. Forsetinn hefur hins vegar ekki rætt við forystumenn stjórnarandstöðunnar frá því hann fékk lögin afhent.

Mikilvægt að lögin nái fram að ganga

Vilhjálmur Egilsson, framkvæmdastjóri Samtaka atvinnulífsins, segja mikilvægt að lögin nái fram að ganga. „Við teljum að herkostnaðurinn að því að bíða og reyna að ná betri samningi sé miklu meiri heldur en að það réttlæti hugsanlegan ávinning."

Bretar og Hollendingar hafi beitt sér gegn Íslendingum í aðdraganda málsins. „Við teljum að þeir muni að öllum líkindum taka á ný upp baráttu gegn okkur og þeir geta valdið okkur miklum skaða ef þeir beita sér í málinu," segir Vilhjálmur.



Blaðamannafundurinn í beinni á Stöð 2, Bylgjunni og Vísi

Embættismenn á skrifstofu forseta Íslands hafa verið þöglir sem gröfin um áform forsetans í dag. Hins vegar tilkynnti embættið síðdegis að forsetinn boðaði til fréttamannafundar á Bessastöðum klukkan ellefu í fyrramálið.

Bein útsending verður á Stöð 2, Bylgjunni og Vísi frá blaðamannafundi forsetans á morgun klukkan ellefu.