Fréttamál vikunnar: Frá kynþáttahatri til gengislána

Sennilega var gengisdómurinn stærsta fréttamál vikunnar en þá staðfesti Hæstiréttur Íslands úrskurð Héraðsdóms Reykjavíkur um að gengistryggðir bílalánasamningar skyldu fylgja vöxtum Seðlabanka Íslands en ekki samningsvöxtum. Björn Þorri Viktorsson, lögfræðingur, sagði málið áfall fyrir neytendur og í sama streng tók Gísli Tryggvason, talsmaður Neytenda.

Steingrímur J. Sigfússon fjármálaráðherra taldi niðurstöðuna samræmast því sem hann teldi réttast. Í kjölfarið steig Árni Páll Árnason, nýskipaður efnahags- og viðskiptaráðherra fram, og boðaði lögsetningu sem tryggði sanngirni í afborgunum af gengislánum. Þar kom fram að eftirstöðvar lána minnka um allt að helming. Til stendur að leggja frumvarpið fram strax á haustþingi.

Hér mál lesa meira.

Kúbverskir feðgar og meint kynþáttahatur

Annað mál vakti gríðarlega athygli í vikunni en það voru fréttir af ofsóknum gagnvart kúbverskum feðgum. Það var Ríkissjónvarpið sem greindi fyrst frá málinu. Þar kom fram að málið hefði grundvallast á kynþáttahatri og að handrukkari hefði hótað feðgunum lífláti. Þeir flýðu land í kjölfarið.

Maðurinn var handtekinn og úrskurðaður í gæsluvarðhald daginn eftir. Vísir greindi svo frá því snemma í vikunni að sá sem var úrkskurðaður í varðhald var athafnamaðurinn Jón Hilmar Hallgrímsson. Sá hafði áður komist í kast við lögin þegar víkingasveitin ruddist inn á heimiliið hans á síðasta ári í þeirri trú að hann væri vopnaður. Það reyndist þó ekki rétt.

Jóni var sleppt tveimur dögum fyrr en áætlað var, eða á miðvikudeginum. Verjandi hans, Sveinn Andri Sveinsson, gagnrýndi fjölmiðla fyrir harða framgöngu gagnvart skjólstæðingi sínum sem liggur undir áburði um kynþáttahatur.

Það var svo Besti flokkurinn sem boðaði til Kærleiks- og friðargöngu á laugardaginn. Yfir þúsund manns mættu og sýndu fjölmenningarsamfélaginu stuðning í verki. Kúbversku feðgarnir komust þó ekki í gönguna þar sem þeir eru enn staddir erlendis. Von er á þeim í vikunni.

Hér mál lesa meira.

Prestur játaði kynferðisbrot

Um miðja viku greindi Vísir frá því að prestur hefði leitað á tvo unglinga og fulltíða einstakling fyrir 25 árum síðan. Maðurinn játaði brot sín fyrir fagráði Biskupsstofu um kynferðisbrot. Málið reyndist vera fyrnt en Biskupsstofa sendi frá sér tilkynningu þar sem það var áréttað að presturinn sem um ræddi var hættur störfum auk og ætti ekki afturkvæmt.

Hér er hægt að lesa meira.

Atlanefndin og meintir misskilningar

Þingheimur ræddi svo niðurstöður Atlanefndarinnar svokölluðu sem dró lærdóm af skýrslu rannsóknarnefndar Alþingis. Meðal niðurstaðna í skýrslunni var sú að fjórir ráðherrar Þingvallastjórnarinnar hefðu gerst brotlegir í andvaraleysi sínu í hruninu. Nefndin lagði til að eftirfarandi ráðherrar yrði ákærðir: Ingibjörg Sólrún Gísladóttir, fyrrverandi utanríkisráðherra, Geir H. Haarde, fyrrverandi forsætisráðherra, Björgvin G. Sigurðsson, fyrrverandi efnahags- og viðskiptaráðherra og Fjármálaráðherrann Árni M. Mathíesen.

Ekki náðist samstaða um þetta innan nefndarinnar. Hún þríklofnaði í málinu en Sjálfstæðismenn vildu ekki ákæra neinn á meðan Samfylkingin vildi ákæra alla nema Björgin G. Sigurðsson.

Enginn af fyrrverandi ráðherrunum vildu tjá sig sérstaklega um málið. Geir sendi þó frá sér tilkynningu og bar af sér sakir. Ingibjörg Sólrún tók hinsvegar til varna á samskiptavefnum Facebook.

Meðal annars hitti hún þingflokk Samfylkingarinnar á óformlegum fundi. Athygli vakti að aðeins helmingur þingmanna mættu. Allir ráðherrarnir létu þó sjá sig. Björgvini var einnig boðið til fundarins en hann afþakkaði boðið pent.

Síðar fór Ingibjörg að munnhöggvast við Atla Gíslason, formann nefndarinnar, en hann lét hafa eftir sér að hún hefði misskilið málið. Því svaraði Ingibjörg að bragði, hún sagðist ekki hafa misskilið neitt, í raun væri ákæruvilji Atla á misskilningi byggður.

Hér mál lesa frétt um málið. Þá má einnig lesa meira hér.

Forsetanum svarað

Forseti Íslands, Ólafur Ragnar Grímsson, fór svo mikinn í Kína þar sem hann var í opinberri heimsókn. Þar sagði hann í viðtali að það væri vert að spyrja sig hverskyns félagsskapur ESB væri í raun og veru. Össur Skarphéðinsson utanríkisráðherra fann sig knúinn til þess að gagnrýna forsetann fyrir að fylgja ekki þeirri utanríkisstefnu sem væri samþykkt af Alþingi.

Hér má svo lesa gagnrýni Össurar.

Mótmælti fangelsun samviskufanga

Og meira af Kína. Borgarstjóri Reykjavíkur, Jón Gnarr, tók á móti fyrrverandi borgarstjóra Peking, Liu Qi, í Ráðhúsi Reykjavíkur í vikunni. Með Liu var fimmtán manna sendinefnd. Töluðu þeir meðal annars um orkumál. Þegar að því kom að kveðjast afhenti Jón fyrrverandi borgarstjóranum bréf þar sem kínversk stjórnvöld eru gagnrýnd harðlega fyrir að handtaka og fangelsa andófsmanninn og ljóðskáldið Liu Xiaobo. Hann var dæmdur í 11 ára fangelsi fyrir skoðanir sínar.

Svo er því lýst þegar borgarstjórinn fyrrverandi varð heldur kindarlegur og uppnám varð á meðal sendinefndarinnar við móttöku bréfsins. Sendinefndin tók bréfið af Liu og stuttu síðar yfirgaf borgarstjórinn fyrrverandi, ásamt föruneyti, Ráðhúsið án þess að kveðja Jón formlega.

Hérna má lesa spaugilega lýsingar af fundinum.

Snéri aftur á þing

Í upphafi vikunnar snéri kunnuglegt andlit aftur á þing. Það var Þorgerður Katrín Gunnarsdóttir, þingmaður Sjálfstæðisflokksins. Hún tók sér leyfi frá þingstörfum fyrr á árinu á meðan þingnefnd fjallaði um rannsóknarskýrslu Alþingis en hún og eiginmaður hennar Kristján Arason komu við sögu í skýrslunni.

Varaþingmaður hennar, Óli Björn Kárason, þurfti því frá að hverfa en hann hafði látið til sín taka, meðal annars í umræðunni um fjölmiðlalögin.

Hér er frétt um málið.