Ragnheiður Elín: Best að boða til kosninga

Þrír þingmenn Vinstri grænna lýstu því yfir um helgina að þeir ætli ekki að styðja ríkisstjórnina áfram takist ekki að ógilda kaup Magma Energy á HS Orku. Ríkisstjórnin vinnur nú að því að skoða möguleikana í stöðunni.

Ragnheiður Elín Árnadóttir, þingflokksformaður Sjálfstæðisflokksins, óttast það fordæmi sem skapast ef ríkisstjórnin reynir að grípa inn í samninginn og ógilda hann.

„Við erum þannig stödd hér á Íslandi að við þurfum að koma verðmætasköpun og hagvexti í gang og til þess að gera það þurfum við fjárfestingu bæði frá erlendum og innlendum aðilum. Og ef ríkisstjórnin ætlar að viðhafa þau vinnubrögð að grípa inn í og breyta reglum afturvirkt, tel ég að það verði ekki til að auka áhuga hvorki innlendra né erlendra fjárfesta í atvinnusköpun hér á landi."

Ragnheiður Elín segir að með lagasetningunni árið 2008 hafi opinbert eignarhald á auðlindum landsins verið tryggt. Hún telur sjálfsagt að ræða um atriði eins og lengdina á leigutímanum, forkaupsréttaratriði og annað slíkt. „...en ef menn ætla að fara að ógilda samninga sem þeir eiga ekki aðkomu að sjálfir þá finnst mér við vera á hættulegri braut."

Ragnheiður Elín segir ríkisstjórnina óstarfhæfa. Magma málið sé dæmi um það. Þarf að boða til nýrra kosninga?

„Það væri auðvitað best að boða til kosninga. Það sér það hver maður að þessi ríkisstjórn sem nú situr er óstarfhæf. Vinstri grænir hafa svo lengi í þessu samstarfi beygt sig undir vilja samstarfsflokksins og núna með því að setja fram svona hótanir þá eru þeir allavegana hluti kominn á bjargbrúnina, þú getur ekki endalaust sett fram hótanir nema að standa við þær," segir Ragnheiður Elín.

Erfið verkefni séu framundan í haust, til dæmis fjárlagagerðin, og ef ríkisstjórnin geti ekki klárað þetta mál geti hún ekki tekið á öðrum málum sem brýnt er að taka á. Það þurfi að koma á starfhæfri ríkisstjórn.