Umfjöllun: Keflvíkingar unnu í óþarflega spennandi leik

Keflavík höfðu betur gegn Selfossi í óþarflega spennandi leik á Njarðtaksvellinum í Reykjanesbæ í kvöld, 2-1. Sigur heimamanna hefði í raun átt að vera mun stærri en sóknarmönnum Keflvíkinga tókst illa upp við að koma boltann framhjá Jóhanni Ólafi Sigurðssyni í marki Selfossar sem átti fínan leik.

Leikurinn byrjaði afar hægt og jafnræði var með liðunum í upphafi leiks. Sævar Þór Gíslason skoraði hins vegar mark upp úr þurru á 20. mínútu eftir vægast sagt slæm mistök Árna Freys Ásgeirssonar í marki Keflavíkur. Löng sending kom inn fyrir vörn Keflavíkur sem Árni Freyr virtist vera búinn að grípa. Hann missti hins vegar boltann aftur fyrir sig þar sem Sævar Þór Gíslason var réttur maður á réttum stað og afgreidd boltann auðveldlega í autt markið. Skelfileg mistök hjá Árna í markinu sem er að leika sinn fyrsta byrjunarliðsleik í fjarveru Ómars Jóhannssonar sem er meiddur.

Keflvíkingar sóttu í sig veðrið við mótlætið og tólf mínútum síðar var Paul McShane búinn að jafna leikinn með laglegu skoti í vítateig. Hann fékk góða fyrirgjöf frá Alen Sutej og setti boltann framhjá Jóhanni Ólafi í hægra hornið. Staðan þar með jöfn og Keflvíkingar tóku öll völd á vellinum.

Þrátt fyrir að fá mörg fín færi var staðan jöfn í hálfleik og varði Jóhann Ólafur oft vel í marki Selfyssinga. Í síðari hálfleik héldu Keflvíkingar uppteknum hætti og komu sér oft í góð færi. Seinna mark Keflavíkur lá í loftinu og á 56. mínútu kom Hörður Sveinsson Keflvíkingum yfir. Magnús Sverrir Þorsteinsson átti frábært skot í slá Selfyssinga sem hrökk aftur út í teiginn og Hörður Sveinsson var þar einn á auðum sjó og átti ekki í vandræðum með að skora af stuttu færi.

Þrátt fyrir að liggja í sókn næstu mínúturnar náðu Keflvíkingar ekki að láta kné fylgja kviði og Selfyssingar náðu að komast betur inn í leikinn á lokamínútunum. Guðmundur Þórarinsson fékk góð færi úr aukaspyrnum undir lokin en Selfyssingar náðu ekki að stela stig úr leiknum.

Sigur Keflvíkinga var fyllilega sanngjarn og í raun ótrúlegt að hann skyldi ekki hafa orðið stærri. Þeir eru með þétt og gott lið en markvarðarstaðan er stórt spurningarmerki. Fátt var um fína drætti í liði Selfyssinga sem mættu ofjörlum sínum í kvöld. Þeir gerðu hins vegar vel í að tapa leiknum ekki með stærri mun.

Keflavík – Selfoss 2-1

0-1 Sævar Þór Gíslason (20.)

1-1 Paul McShane (32.)

2-1 Hörður Sveinsson (55.)

Áhorfendur: 1463

Dómari: Jóhannes Valgeirsson 7

Skot (á mark): 17-8 (8-2)

Varin skot: Árni 1 – Jóhann 5

Hornspyrnur: 4-3

Aukaspyrnur fengnar: 10-8

Rangstöður: 4-1

Keflavík (4-4-2):

Árni Freyr Ásgeirsson 5

Guðjón Á. Antoníusson 5

Haraldur F. Guðmundsson 6

Bjarni Hólm Aðalsteinsson 6

Alan Sutej 6

Paul McShane 7

Jóhann Birnir Guðmundsson 6

(86. Magnús Þórir Matthíasson -)

Hólmar Örn Rúnarsson 7 - maður leiksins

Magnús S. Þorsteinsson 6

(86. Brynjar Guðmundsson -)

Hörður Sveinsson 6

Guðmundur Steinarsson 6

Selfoss (4-4-2):

Jóhann Ólafur Sigurðsson 6

Sigurður Eyberg Guðlaugsson 5

Stefán Ragnar Guðlaugsson 5

Agnar Bragi Magnússon 5

Andri Freyr Björnsson 4

Guðmundur Þórarinsson 6

Jón Guðbrandsson 5

(63. Ingi Rafn Ingibergsson 5)

Ingólfur Þórarinsson 5

Jón Daði Böðvarsson 5

Arilíus Marteinsson 4

(63. Einar Ottó Antonsson 5)

Sævar Þór Gíslason 6

(82. Davíð Birgisson -)



Leiknum var lýst beint á Boltavakt Vísis og Fréttablaðsins. Smelltu hér til að lesa lýsingu leiksins: Keflavík - Selfoss.