Leggja slitlag síðustu metrana að Landeyjahöfn

Verktakar á Landeyjasandi vinna nú hörðum höndum við að leggja slitlag á síðustu 800 metrana af veginum niður að nýju Landeyjahöfninni, en Herjólfur byrjar áætlunarferðir þangað í dag.

Að sögn talsmanns verktakans, Suðurverks, verður allt til reyðu í tæka tíð. Herjólfur fór í sína síðustu áætlunarferð frá Vestmannaeyjum til Þorlákshafnar í morgun og er nú á leið aftur til Eyja.

Þaðan fer skipið svo síðdegis til hinnar nýju Landeyjahafnar, í fyrstu áætlunarferðina. Siglingaleiðin á milli nýju hafnarinnar og Eyja er 30 til 40 mínútur, en hefur verið átt í þrjár klukkustundir á milli Eyja og Þorlákshafnar.

Á móti lengist ökuferðin á milli Eyja og höfuðborgarsvæðisins töluvert. Umferðarþungi mun aukast frá Þrengslaafleggjarnum í Svínahrauni, austur yfir Hellisheiði, í gegn um Selfoss um Suðurlandsveg og í gegnum Hellu og Hvolsvöll uns beygt er til hægri niður á Bakka, skammt frá Markarfljóti, eða Eyjafjallajökli.

Heimamenn, beggja vegna sundsins, binda vonir við að aukna samvinnu í atvinnu- og félagslífi milli Eyjamanna og íbúa Suðurlands með tilkomu nýju hafnarinnar og siglingaleiðarinnar.