Landeyjahöfn kostar fjóra milljarða

Gerð Landeyjahafnar kostaði fjóra milljarða króna, samkvæmt upplýsingum í fréttatilkynningu frá Samgöngu- og sveitastjórnarráðuneytinu og Siglingastofnun.

Höfnin verður vígð í dag. Ferðatíminn á sjó milli lands og Eyja styttist verulega, úr tæpum þremur klukkustundum í rúmar 30 mínútur og samtals styttast því sigling og akstur til Reykjavíkur úr fjórum klukkustundum í tvær og hálfa klukkustund.

Þrátt fyrir efnahagshrun, eldgos og á köflum óvenju erfitt tíðarfar tókst með góðri samvinnu að ljúka gerð mannvirkjanna innan fjárhags- og tímamarka.

Framkvæmdin fól í sér byggingu tveggja 700 metra langra brimvarnargarða, 3,9 kílómetra sjóvarnar- og leiðigarða í Bakkafjöru og við Markarfljót, dýpkun og byggingu ferjubryggju og aðstöðu, svo og vegagerð að Landeyjahöfn, segir í fréttatilkynningunni.

Í brimvarnargarðana þurfti um 670.000 rúmmetra af grjóti, innri grjótgarða 100.000 rúmmetra og í varnargarðana 80.000 rúmmetra af grjóti og um 200.000 af möl. Magn dýpkunarefnis er um 220.000 rúmmetrar.

Landgræðslan náði yfir 600 hektara, lóðin er um 4 hektarar og steypt bryggja 70 metra löng.

Farþegahúsið er 400 fermetrar með snyrtingum og veitingaaðstöðu.

Vega- og brúargerð fól í sér gerð 11,8 kílómetra Bakkafjöruvegar (254) milli Hringvegar og Landeyjahafnar, byggingu 20 metra langrar brúar á Ála og nýja vegtengingu milli Bakkafjöruvegar og Bakkaflugvallar.