Suðurnesjaliðin unnu í Lengjubikarnum

Suðurnesjaliðin Keflavík og Grindavík hrósuðu sigri í þeim leikjum sem voru í A-deild Lengjubikarsins í dag.

Keflavík vann Þrótt örugglega 4-1. Magnús Þórir Matthíasson skoraði fyrsta markið og kom Keflavík yfir en Hörður Bjarnason jafnaði fyrir Þróttara og staðan 1-1 í hálfleik.

Hörður Sveinsson endurheimt forystuna fyrir Keflavík og svo skoraði Ómar Karl Sigurðsson. Ómar er ný leikmaður hjá Keflavík, fæddur 1982 og er miðjumaður. Hann spilaði síðast með Mandalskameratene frá Noregi og áður spilaði hann með Haukum árin 2002-2008.

Annar nýr leikmaður hjá Keflavík batt endahnútinn, Andri Steinn Birgisson. Keflavík var að leika sinn þriðja leik á sex dögum.

Síðdegis vann Grindavík sigur á Stjörnunni 3-2 þar sem Gilles Mbang Ondo var í miklu stuði og skoraði öll þrjú mörk Grindavíkur.

Ólafur Karl Finsen og Þorvaldur Árnason skoruðu fyrir Stjörnuna. Ólafur er á lánssamningi hjá Stjörnunni frá AZ Alkmaar út þetta ár.

Upplýsingar fengnar frá Fótbolti.net.