Mancini: Adebayor þarf að einbeita sér að starfinu sínu

Roberto Mancini, stjóri Manchester City, gefur lítið fyrir þær fullyrðingar Emmanuel Adebayor að hann sé á leið í burtu frá félaginu í janúar næstkomandi.

Adebayor lýsti því yfir í viðtali við franska fjölmiðla fyrr í vikunni að City væri búið að komast að samkomulagi við Juventus um að lána hann í janúar.

Félagið neitaði því staðfastlega og nú hefur Mancini sent honum skýr skilaboð.

„Það er mikilvægt fyrir alla leikmenn að hugsa vel um starfið sitt," sagði Mancini. „Þega þeir spila verða þeir að spila vel. Svo getum við séð til."

„Staðan gæti breyst í janúar en það er enginn leikmaður ánægður þegar hann fær ekki að spila. Það eru margir leikir framundan á skömmum tíma og allir leikmenn munu spila í þessum mánuði."