Viðar Örn: Fyrri hálfleikur var skelfing en sá seinni algjör draumur

„Þetta var yndislegt og við hefðum ekki getað gert þetta betur. Fyrri hálfleikur var skelfing en seinni hálfleikur var algjör draumur," sagði varamaðurinn Viðar Örn Kjartansson. Hann kom inn á í stöðunni 1-2 fyrir Keflavík þegar 16 mínútur voru eftir, fiskaði víti sem gaf jöfnunarmarkið og skoraði síðan sigurmarkið sjálfur.

„Ég vonaðist til að fá hálftíma en fékk bara rúmt korter. Maður verður að nýta tækifærið þegar maður fær það. Það er bara svoleiðis," sagði Viðar Örn kátur sem skoraði sigurmarkið eftir frábæra stungusendingu frá Viktori Unnari Illugasyni.

„Ég var kominn einn á móti markverði og þá er bara aðeins að horfa á markið og sjá hvar er hægt að setja hann. Ég fann rétta staðinn," sagði Viðar Örn.

„Við þurfum að vinna nokkra leiki í viðbót til þess að bjarga okkur. Við vitum að það er nóg af úrslitaleikjum framundan en við tökum bara einn leik í einu og nú er bara að stefna á sigur á móti Fram á mánudaginn," sagði Viðar.

„Ég vorkenndi stuðningsmönnunum eftir annað markið en við svöruðu algjörlega hálfleiksræðunni hjá Gumma. Þetta gat ekki verið betra og ég gat ekki byrjað þetta betur eftir meiðslin. Ég fæ vonandi að spila eitthvað meira á næstunni því þetta er bara byrjunin af því sem koma skal," sagði Viðar að lokum.