Þórir: Rautt spjald er rautt spjald

Þórir Hákonarson, framkvæmdastjóri KSÍ, segir að engin fordæmi séu fyrir því að leikmönnum sé refsað sérstaklega fyrir það hér á landi að hagræða leikbönnum sínum.

Guðmundur Sævarsson, bakvörður FH, sleppur við leikbann í bikarúrslitaleiknum þar sem hann nældi sér í sitt annað gula spjald gegn ÍBV í uppbótartíma.

Í staðinn tekur hann út leikbann sjálfkrafa í næsta deildarleik sem er gegn Breiðabliki á sunnudag. „Rautt er bara rautt og ég veit ekki til þess að fordæmi séu fyrir því að vikið sé út frá reglum í svona tilfellum. Rautt spjald er bara rautt spjald," sagði Þórir í samtali við Vísi.

Dómari leiksins getur tekið það fram í skýrslu sinni ef hann telur einhvern leikmann hafa orðið uppvís að óíþróttamannslegri framkomu og aganefnd tekur það þá fyrir. Ekki er talið að dómarinn í gær, Þóroddur Hjaltalín Jr., hafi gert það.