Óli Þórðar: Gáfum þetta frá okkur

„Þetta endaði svona því miður ," sagði Ólafur Þórðarson þjálfari Fylkismanna eftir 3-0 tap þeirra á KR vellinum í dag. „Það var ekkert undir í þessum leik þannig séð en við hefðum getað farið upp um sæti og vorum að spila upp á stoltið en við gáfum þetta frá okkur"

Mark var dæmt af Fylkismönnum í stöðunni 1-0 og KR brunuðu í sókn og bættu við, fljótlega eftir það fékk Ásgeir Börkur rautt og var verkefnið því strembið fyrir Fylkismenn.

„Það var leiðinlegt atvik en við eigum að geta tæklað það, mér fannst við þó eiga að fá vítaspyrnu í fyrri hálfleik og því hefði staðan geta verið 1-1 þar og menn fóru að pirrast. Þeir nýttu sér þá möguleikann og settu annað á okkur. Ásgeir Börkur fær svo klaufalegt rautt en það er ekkert við því að gera "

Fylkismenn enduðu í níunda sæti í deildinni eftir að hafa átt frábært tímabil í fyrra þar sem þeir enduðu í þriðja sæti.

„Við vissum fyrir tímabilið að þetta yrði mun erfiðara í ár, við misstum tvo leikmenn úr hópnum frá því í fyrra sem voru miklir reynsluboltar. Eftir sátu enn fleiri ungir strákar og svona fór það"

Ólafur framlengdi samning sinn við Fylki um 2 ár og stefnir hann á að bæta gengi liðsins næstu ár.

„Við getum klárlega gert betur á næsta ári, við stefnum á að gera betur þá. Ef maður setur sér ekki háleit markmið hefur maður engu að keppa svo maður verður að horfa fram á við og stefna hátt," sagði Ólafur.