Olgeir: Erfitt að brjóta ísinn

Olgeir Sigurgeirsson var fyrirliði Breiðabliks í dag í fjarveru Kára Ársælssonar en hann hefur gengið í gegnum súrt og sætt með liðinu undanfarin sjö ár.

„Ég er stoltur og ánægður. Þetta er það sem við höfum verið að stefna að. Þó svo að þetta hafi verið erfitt í dag var þetta virkilega ljúft. Þetta er mun sætara en að verða bikarmeistari," sagði Olgeir en Blikar urðu bikarmeistarar í fyrra. Það var fyrsti stóri titill í sögu félagsins.

Blikum dugði markalaust jafntefli gegn Stjörnunni í dag en leikurinn var afar spennuþrunginn.

„Það var erfitt að brjóta ísinn. Stjörnumenn voru skipulagðir og lágu til baka. Ég hef aldrei séð þá spila þannig. Þeir spila oftast opið og sækja hratt. Það var erfitt að brjóta þá á bak aftur," sagði Olgeir.

ÍBV var einu stigi á eftir Blikum fyrir leiki dagsins og hefði því dugað sigur gegn Keflavík í dag til að hirða toppsætið af Breiðabliki.

„Þegar við heyrðum að ÍBV væri að tapa 2-0 héldum við boltanum og vorum þannig séð ekkert að sækja á markið. Við vorum bara að hugsa um að halda hreinu."

„En þetta lið er ótrúlegt. Það er frábært að hugsa til þess að nánast allir leikmenn séu uppaldir hjá félaginu," sagði Olgeir áður en hann hljóp til félaga sinna til að taka við Íslandsmeistarabikarnum.