Skoskir dómarar ætla í verkfall

Samtök knattspyrnudómara í Skotlandi vilja fara í verkfall um næstu helgi eftir því sem fram kemur á vef Sky Sports í dag.

Dómarar í Skotlandi hafa mátt þola mikla gagnrýni í haust og hafa sumir fengið líflátshótanir frá stuðningsmönnum knattspyrnuliða í skosku úrvalsdeildinni.

Nýlega komst mál dómarans Dougie McDonald í hámæli eftir atvik sem átti sér stað í leik Celtic og Dundee United. McDonald hafði dæmt vítaspyrnu Celtic í hag en hann dró svo dóminn til baka.

McDonald gerði illt verra með því að ljúga til um málsatvik í leikskýrslu sinni. Hann sagði að aðstoðardómari hans, Steven Craven, hefði ráðlagt honum að draga dóminn til baka en það var rangt.

Raunin var sú að hann gerði sér fyllilega grein fyrir því sjálfur að dómurinn var rangur og það fékk hann svo staðfest hjá Craven. Aðstoðardómarinn hafi því engin áhrif haft á ákvörðun McDonald.

Þrátt fyrir þetta leiddi rannsókn skoska knattspyrnusambandsins í ljós að McDonald hefði ekkert rangt gert. Hann fékk aðeins áminningu um að vanda sig betur við skýrslugerð sína í framtíðinni. Craven var óánægður með þessa meðferð og ákvað að hætta dómgæslu.

Margir hafa nú stigið fram og gagnrýnt McDonald harkalega opinberlega. Meðal þeirra eru John Reid, stjórnarformaður Celtic, og Neil Lennon, knattspyrnustjóri liðsins. Stjórnarformaður skoska knattspyrnusambandsins hefur einnig lofað því að taka refsingarkerfi dómara til endurskoðunar.

Dómarar funduðu í gær og mun þetta vera niðurstaðan. Sex leikir eru á dagskrá skosku úrvalsdeildarinnar um helgina sem og mikið af leikjum í neðri deildunum og bikarkeppninni.

Þess má svo geta að téður McDonald dæmdi viðureign Danmerkur og Íslands í undankeppni EM 2012 á Parken í september síðastliðnum.