Tottenham lenti 2-0 undir á móti Arsenal en vann leikinn 3-2

Tottenham vann sinn fyrsta útisigur á Arsenal í ensku úrvalsdeildinni í 17 ár þegar liðið kom til baka eftir að lent 2-0 undir og tryggði sér 3-2 sigur. Younes Kaboul skoraði sigurmark Tottenham á 85. mínútu leiksins en Rafael van der Vaart skoraði eitt og lagði upp hin tvö.

Arsenal-menn byrjuðu betur, voru miklu betri í fyrri hálfleiknum og 2-0 yfir í hálfleik. Tottenham minnkaði muninn í upphafi seinni hálfleiks og jafnaði síðan munin eftir klaufaleg mistök fyrirliða Arsenal, Cesc Fabregas.

Sigurmark Younes Kaboul kom með skalla eftir aukaspyrnu Raphael van der Vaart þegar aðeins fimm mínútur voru til leiksloka. Kaboul kórónaði þarna flottan leik hjá sér.

Samir Nasri kom Arsenal í 1-0 eftir aðeins níu mínútna leik. Nasri fékk þá frábæra stungusendingu frá Cesc Fabregas, sólaði Heurelho Gomes, markmann Tottenham, og náði að skora úr þröngri stöðu frá endalínunni. Gomes hikaði í úthlaupinu og það nýtti Frakkinn sér vel.

Marouane Chamakh skoraði annað mark Arsenal á 27. mínútu þegar hann afgreiddi lága fyrirgjöf frá Andrei Arshavin í markið en markið kom eftir dæmigerða einna snertinga skyndisókn Arsenal.

Harry Redknapp skipti Jermain Defoe inn á í hálfleik og það tók Tottenham menn aðeins rúmar fjórar mínútur að minnka muninn.

Defoe átti þátt í markinu með því að koma boltanum á Rafael van der Vaart sem átti sniðuga sendingu inn í hlaupaleið Gareth Bale. Bale tók boltann með sér og afgreiddi hann laglega í hornið.

Rafael van der Vaart jafnaði leikinn síðan á 67. mínútu þegar hann skoraði af öryggi úr vítaspyrnu. Vítið var dæmt á Fabregas fyrir að setja hendina fyrir skot Van der Vaart úr aukaspyrnu og var það mjög undarlegur varnarleikur hjá fyrirliða Arsenal.

Tottenham fór upp í 5. sæti ensku úrvalsdeildarinnar með þessum sigri og er nú fjórum stigum á eftir Arsenal. Arsenal-liðið hefði jafnað topplið Chelsea að stigum hefði liðið unnið þennan leik eins og allt stefndi í þegar liðin gengu til hálfleiks.