Ríkissaksóknari hefur ekki ákæruvald í efnahagsbrotamálum

Ríkissaksóknari segist ekki hafa ákæruvald í efnahagsbrotamálum og furðar sig á öllu tali um ranga forgangsröðun í tengslum við ákæruna gegn fólki sem mótmælti við Alþingishúsið í desember 2008. Hörður Torfason, tónlistarmaður og mótmælandi, er einn þeirra sem hefur gagnrýnt Ríkissaksóknara.

„Skrifstofustjóri kærir fyrir árás á Alþingi og kærir til lögreglu eins og lög gera ráð fyrir. Lögreglan á höfuðborgarsvæðinu rannsakar þetta mál enda slösuðust þarna sjö manns," segir Valtýr Sigurðsson ríkissaksóknari. Þegar rannsókn lögreglunnar ljúki þurfi hún annað hvort að ákæra sjálf eða senda ríkissaksóknara málið ríkissaksóknara, sem hafi verið gert í þessu tilviki. Ríkissaksóknari hafi fengið málið í október síðastliðnum. „Samkvæmt vinnureglum okkar á að ljúka öllum málum sem koma hingað inn innan mánaðar. Það náðist ekki og því var verið að ákæra í málinu núna," segir Valtýr.

Hann bendir á að Ríkissaksóknari fari hins vegar ekki með ákæruvaldið í efnahagsbrotamálum. „Því síður rannsökum við efnahagsbrot. Það gerir Efnahagsbrotadeild Ríkislögreglustjóra, segir Valtýr. En auk Ríkislögreglustjórans, sér sérstakur saksóknari um að rannsaka og ákæra í efnahagsbrotamálum. Valtýr bætir því við að Ríkissaksóknari hafi ekki lögreglumenn á sínum snærum og rannsaki því ekki mál sjálfur.

Þá segist Valtýr hafa orðið var við umræðu um að að Ríkissaksóknari ætti að veita sakaruppgjöf í málinu. Ríkissaksóknari hafi hins vegar ekki neina heimild til þess. „Hins vegar er eina krafan sem hægt er að gera til Ríkissaksóknara sú að hann gæti jafnræðis og ákæri þegar að um refsiverða háttsemi er að ræða að hans mati. Síðan er það mál dómstólanna að skera úr því," segir Valtýr.