Umfjöllun: Laufléttur sigur hjá Fram í Laugardalnum

Framarar unnu 3-1 sigur á Blikum á Laugardalsvellinum í kvöld og sáu til þess að Blikar náðu ekki að endurheimta toppsætið af Eyjamönnum. Þetta var fyrst deildartap Blika síðan 14. júní

Meistaraefnin úr Kópavoginum mættu Frömurum sem höfðu verið í hægagangi undanfarnar vikur. Bæði lið þurftu nauðsynlega á sigri að halda. Blikar til að jafna Eyjamenn að stigum á toppi deildarinnar og Framarar til að koma sér aftur á beinu brautina og til að halda í við toppliðin.

Blikarnir byrjuðu frískir á upphafsmínútunum og áttu til að mynda tvö skot á marksúlurnar. Eftir 9 mínútna leik breyttist leikurinn hinsvegar til hins verra fyrir þá grænklæddu. Joseph Tillen komst þá upp að endamörkum við hægri kant haf hnitmiðaða sendingu inn í teig, þar kastaði Hjálmar Þórarinsson sér fram og skallaði boltann í netið. 1-0 fyrir Fram og við þetta mark var sem allur vindur væri úr Blikunum.

Framarar tóku öll völd á vellinum og vinnuhestarnir Jón Gunnar og Halldór Hermann á miðjunni hjá Fram gáfu miðjumönnum Blika lítin frið til að byggja upp sóknir. Þegar 23 mínútur voru liðnar af leik bættu Framarar við öðru marki, þar var að verki Almarr Ormarsson.

Eitthvað fum og fát var á vörn Blika og nýtti Almarr sér það. Böðlaðist hann í framhjá varnarmönnum Blika með boltann, Ingvar í markinu virtist hinsvegar ná að góma boltann en Almarr vann boltann af harðfylgni og skoraði í tómt markið. Baráttumark hjá Akureyringnum.

Jón Guðni Fjóluson fullkomnaði svo frábæran fyrri hálfleik Framara með marki úr aukaspyrnu af 25 metra færi á 43 mínútu. Líklegast hefði Ingvar í markinu getað gert betur. 3-0 í hálfleik og Ólafur þjálfari Blika hefur væntanlega messað yfir sínum mönnum í leikhléi.

Ólafur gerði 2 skiptingar í hálfleik og eitthvað virtist það hressa Blikana við. Alfreð sem hafði verið daufur í fyrri hálfleik kunni betur við sig með Guðmund Pétusson sér við hlið.

Markahæsti maður deildarinnar hefði þó átt að nýta dauðafæri í upphafi seinni hálfleiks en lánleysi Blika var algjört. Alfreð átti þó heiðurinn af marki Blika á 71 mínútu. Þá átti hann aukaspyrnu rétt fyrir utan teig sem Hannes varði í stöng. Guðmundur Kristjánsson fylgsi eftir og skoraði. 3-1 og nú eygðu Blikar von.

Því miður fyrir Blika fjaraði sú von út hægt og bítandi. Lítið var boðið upp á síðasta korterið af leiknum og Framarar fögnuðu sanngjörnum sigri. Mjög sterkt hjá Frömurum að vinna Breiðablik og Framara sýndu að þeir geta unnið hverja sem er þegar sá gállinn er á þeim. Blikarnir hinsvegar geta ekki leyft sér að bjóða upp á svona frammistöðu það sem eftir er sumar ætli þeir sér titil.

Fram 3-1 Breiðablik

Laugardalsvöllur, áhorfendur: óuppgefið

Dómari: Magnús Þórisson 8

Skot(á mark)9 (5)- 11 (9)

Varin skot: Hannes - Ingvar 6 - 3

Horn: 4 - 2

Aukaspyrnur fengnar: 22 - 19

Rangstöður: 4 - 1

Fram 4-5-1

Hannes Þór Halldórsson 5

Daði Guðmundsson 6

Kristján Hauksson 7

Jón Guðni Fjóluson 7

Samuel Lee Tillen 6

Joseph Edward Tillen 7

( Jón Orri Ólafsson 86 min - )

Jón Gunnar Eysteinsson 6

Halldór Hermann Jónsson 8 * maður leiksins

Tómas Leifsson 6

(Kristinn Ingi Halldórsson 73 min - )

Almarr Ormarsson 7

Hjálmar Þórarinsson 7

(Guðmundur Magnússon 80 min -)

Breiðablik 4-5-1

Ingvar Þór Kale 4

Arnór Sveinn Aðalsteinsson 5

Elfar Freyr Helgason 5

(Haukur Baldvinsson 63 min) 6

Kári Ársælsson 5

Árni Kristinn Gunnarsson 4

Olgeir Sigurgeirsson 4

(Andri Rafn Yeoman 46 min) 6

Jökull Elísarbetarsson 5

Finnur Orri Margeirsson 6

Guðmundur Kristjánsson 6

Kristinn Steindórsson 5

(Guðmundur Pétursson 46 min) 5

Alfreð Finnbogason 6