United búið að kaupa Lindegaard

Danski landsliðsmarkvörðurinn Anders Lindegaard hefur skrifað undir þriggja og hálfs árs samning við Manchester United.

Kaupverðið er ekki gefið upp en talið er líklegt að það sé um þrjár milljónir punda.

Lindegaard kemur frá Álasundi í Noregi þar sem hann hefur spilað síðan í fyrra. Þangað kom hann frá uppeldisfélagi sínu, OB, þar sem hann fékk fá tækifæri.

Lindegaard er 26 ára gamall og á að baki fjóra leiki með danska landsliðinu, þar af leikinn gegn Íslandi á Parken í september síðastliðnum.

„Anders er einn sá allra efnilegasti úr hópi ungra markvarða í heiminum í dag," sagði Alex Ferguson, stjóri United, á heimasíðu félagsins.

Lindegaard fær ekki leikheimild með United fyrr en í janúar en mun hefja æfingar með liðinu strax í næsta mánuði.

„Það er draumi líkast að hafa gengið til liðs við Manchester United," sagði Lindegaard. „Félagið á gríðarlegt fylgi í Danmörku og það er heiður fyrir mig að koma hingað."