Konunglegt brúðkaup: Fyrstu minjagripirnir í sölu

Þrátt fyrir að enn séu fjórir mánuðir þangað til Vilhjálmur Bretaprins gengur upp að altarinu til að kvænast Kate Middleton eru fyrstu minjagripirnir tengdir brúðkaupinu komnir í sölu.

Um er að ræða fyrstu gripina sem konungsfjölskyldan leggur blessun sína yfir. Búast má við því að á næstu vikum og mánuðum fyllist minjagripabúðir í Bretlandi af slíkum vörum en í dag verða menn að gera sér þrjá gripi að góðu, kaffibolla, disk og pillubox. Gripirnir eru með upphafsstöfum brúðhjónanna og dagsetningu brúðkaupsins, sem verður haldið 29 apríl á næsta ári.