Umfjöllun: FH vann rislítinn Hafnarfjarðarslag

FH vann sigur á Haukum, 0-1, er liðin mættust á Vodafonevellinum í 2. umferð Pepsi-deildar karla. Þetta var heimaleikur Hauka eins furðulega og það nú hljómar.

Það var Björn Daníel Sverrisson sem skoraði eina mark leiksins á 83. mínútu. Beðið var þessa leiks með mikilli eftirvæntingu en hann var rislítill og olli í raun talsverðum vonbrigðum.

Margir bjuggust við fljúgandi tæklingum um allan völl í þessum Hafnarfjarðarslag en sú var ekki raunin. Mikið jafnræði var með liðunum, bæði áttu þau lipra spretti en þeir voru því miður of fáir.

Tvívegis áttu Haukar skot í slá, fyrst Hilmar Geir Eiðsson og svo hefði Arnar Gunnlaugsson getað jafnað metin í seinni hálfleik en sláin bjargaði FH-ingum.

Það var lítið um flottan fótbolta en stemningin var þó gríðargóð í stúkunni enda mættu um 2.200 manns á leikinn. Það voru þó aðeins stuðningsmenn FH-inga sem gátu brosað eftir leik.

Haukamenn eru væntanlega sársvekktir með að hafa ekkert fengið úr leiknum. Þeir mættu fullir sjálfstrausts í leikinn og var ekki að sjá að þarna voru að mætast Íslandsmeistarar og nýliðar í deildinni. Sérstaklega var Hilmar Geir ógnandi í sóknarleik þeirra rauðklæddu.

Björn Daníel Sverrisson kom FH til bjargar þegar hann fékk boltann við vítateigsbogann og afgreiddi hann hreint frábærlega. FH-liðið náði nokkrum ágætis köflum en var annars talsvert frá sínu besta. Báðir markverðirnir voru mjög öruggir í leiknum í kvöld.

Haukar hafa komið mörgum sparkspekingum á óvart með spilamennsku í þessum fyrstu leikjum sínum en það má þó ekki gleyma því að aðeins eitt stig er komið í hús. FH-ingar eru enn ekki komnir almennilega í gang en stigin voru þeirra í kvöld og það er það sem máli skiptir.

Haukar-FH 0-1

0-1 Björn Daníel Sverrisson (83.)

Dómari: Jóhannes Valgeirsson (7)

Áhorfendur: 2200

Skot (á mark): 14-11 (4-3)

Varið: Daði 3 – Gunnleifur 4

Horn 3-5

Rangstaða: 1-4

Aukaspyrnur fengnar: 13-9

Haukar 4-5-1

Daði Lárusson 7

Pétur Sæmundsson 5

Kristján Ómar Björnsson 5

Daníel Einarsson 6

Gunnar Ásgeirsson 4

(87. Úlfar Pálsson -)

Hilmar Trausti Arnarsson 6

Sam Manton 4

Hilmar Rafn Emilsson 4

(87. Kristján Óli Sigurðsson -)

Guðjón Lýðsson 5

Hilmar Geir Eiðsson 7 - Maður leiksins -

Arnar Gunnlaugsson 7

FH 4-3-3

Gunnleifur Gunnleifsson 7

Guðmundur Sævarsson 4

Tommy Nielsen 6

Hafþór Þrastarson 5

Pétur Viðarsson 4

Gunnar Már Guðmundsson 5

(38. Jacob Neestrup  5)

Ásgeir Gunnar Ásgeirsson 5

Björn Daníel Sverrisson 7

Ólafur Páll Snorrason 6

Atli Viðar Björnsson 6

Torger Motland 3

(70. Hjörtur Logi Valgarðsson 6)