Umfjöllun: Sanngjörn niðurstaða á Hlíðarenda

Valur og FH skildu jöfn, 2-2, í opnunarleik Pepsi-deildar karla á Vodafone-vellinum í kvöld, en Valsmenn komust tvívegis yfir í leiknum. Jafnræði var með liðunum í leiknum og jafnteflið sanngjörn niðurstaða.

Leikurinn fór nokkuð rólega af stað en fyrsta alvöru færið fengu heimamenn. Arnar Sveinn Geirsson sendi þá á danska sóknarmanninn Danni König sem var kominn í ákjósanlegt færi en Gunnleifur Gunnleifsson varði í markinu.

Arnar lagði svo aftur upp á König á 36. mínútu en að þessu sinni náði Gunnleifur ekki að verja og staðan orðin 1-0. Fram að þessu marki hafði ekki mikið merkilegt gerst en markið opnaði leikinn.

Aðeins þremur mínútum eftir mark König náði FH að jafna í 1-1. Atli Viðar Björnsson skoraði eftir að Hákon Atli Hallfreðsson hafði vippað boltanum skemmtilega yfir vörn Valsmanna.

FH-ingar voru síðan sterkara liðið út hálfleikinn en staðan 1-1 þegar Kristinn Jakobsson flautaði til hálfleiks.

Valsmenn lögðu sig alla fram gegn Íslandsmeisturunum og komust yfir á 66. mínútu. Varnarlína FH var ansi óörugg í leiknum og Freyr Bjarnason gerði herfileg mistök sem kostaði mark. Arnar Sveinn kórónaði flottan leik sinn með því að skora.

En FH-ingar áttu lokaorðið á 83. mínútu. Reynir Leósson var þá dæmdur brotlegur innan teigs eftir að Matthías Vilhjálmsson hafði fallið. Gunnar Már Guðmundsson, fyrrum herra Fjölnir, steig á punktinn. Spyrna hans var slök en Kjartan Sturluson, markvörður Vals, náði þó ekki að verja og úrslitin 2-2.

FH var án Atla Guðnasonar sem er meiddur og horfði á í stúkunni. Fleiri lykilmenn hafa átt við meiðsli að stríða og Matthías og Hjörtur Logi Valgarðsson byrjuðu báðir á bekknum. Í vörnina var mættur ungur strákur, Hafþór Þrastarson.

FH-ingar náðu ekki upp nægilega góðu flæði í leik sinn, áttu ágætis rispur en voru heilt yfir langt frá sínu besta. Valsmenn börðust vel. Stígandi var í leik þeirra á undirbúningstímabilinu og þeir geta gert mun betri hluti en spár hafa sagt til um.

Leikurinn var allavega fínasta skemmtun og lofar góðu varðandi fótboltasumarið sem nú er hafið.

Valur - FH 2-2

1-0 Danni König (36.)

1-1 Atli Viðar Björnsson (39.)

2-1 Arnar Sveinn Geirsson (66.)

2-2 Gunnar Már Guðmundsson (víti 82.)

Áhorfendur: 1.796

Dómari: Kristinn Jakobsson 7

Skot (á mark): 7-10 (4-6)

Varin skot: Kjartan 4 - Gunnleifur 2

Horn: 10-8

Aukaspyrnur fengnar: 12-9

Rangstöður: 4-2

Valur 4-3-3

Kjartan Sturluson 6

Stefán Eggertsson 5

Atli Sveinn Þórarinsson 6

Reynir Leósson 5

Martin Pederson 6

Haukur Páll Sigurðsson 7

Ian Jeffs 6

(85. Sigurbjörn Hreiðarsson -)

Rúnar Már Sigurjónsson 5

Baldur Aðalsteinsson 7

(77. Hafþór Ægir Vilhjálmsson -)

Arnar Sveinn Geirsson 8* - Maður leiksins

Danni König 7

(82. Viktor Unnar Illugason -)

FH 4-3-3

Gunnleifur Gunnleifsson 6

Guðmundur Sævarsson 6

Pétur Viðarsson 5

Hafþór Þrastarson 5

Freyr Bjarnason 4

Gunnar Már Guðmundsson 6

Björn Daníel Sverrisson 6

Hákon Atli Hallfreðsson 6

(57. Matthías Vilhjámsson 6)

Ólafur Páll Snorrason 7

Atli Viðar Björnsson 7

(79. Hjörtur Logi Valgarðsson -)

Torger Motland 5

Smelltu hér til að opna Boltavaktina: Valur - FH.