Stoke nálægt því að hreppa Huth

Samkvæmt heimildum Sky Sports fréttastofunnar er löng leit knattspyrnustjórans Tony Pulis hjá Stoke að nýjum varnarmanni senn á enda því úrvalsdeildarfélagið er búið að ná samningum við b-deildarfélagið Middlesbrough um kaupverð á þýska landsliðsmanninum Robert Huth.

Ekki liggur fyrir að svo stöddu hvað kaupverðið kunni að vera en ekki er ólíklegt að Stoke hafi þurft að reiða fram 4-5 milljónir punda þar sem varnarmaðurinn var einnig orðaður við félög á borð við Everton og Aston Villa.

Knattspyrnustjórinn Gareth Southgate hjá Boro var búinn að gefa í skyn fyrr í sumar að hann gæti ekki staðið í vegi fyrir Huth ef hann fengi tækifæri til þess að fara aftur í úrvalsdeildina þar sem það myndi auka möguleika hans á að komast í þýska landsliðið fyrir lokakeppni HM 2010 og nú virðist Huth vera á förum.

Huth mun gangast undir læknisskoðun hjá Stoke í dag og ef allt gengur að óskum þá verður einnig gengið frá samningi í dag.

Stoke var reyndar nálægt því að fá varnarmanninn James Collins frá West Ham á dögunum en leikmaðurinn náði þá ekki samkomulagi við félagið um kaup og kjör þannig að félagsskipti Huth eru heldur ekki höfn eins og staðan er núna.