Verður Ribery fenginn til að fylla skarð Ronaldo?

Breskir fjölmiðlar eru nú uppfullir af sögusögnum um hvað næsta skref Englandsmeistara Manchester United verði eftir að félagið samþykkti 80 milljón punda kauptilboð í Cristiano Ronaldo. Eitt nafn fylgir jafnan fljótlega á eftir í umræðunni en það er Franck Ribery hjá Bayern München.

Flestir fjölmiðlar á Englandi virðast sjá franska landsliðsmanninn sem líklegan arftaka Ronaldo á Old Trafford en Ribery hefur verið að leika frábærlega í þýsku deildinni og Meistaradeild Evrópu síðan Bæjarar fengu hann frá Marseille sumarið 2007 á 25 milljónir evra.

Ribery er hins vegar metinn á um helmingi hærra verð núna eða nálægt 40 milljónum punda og óvíst er hvort að United sé tilbúið að ganga að því.

Glazer fjölskyldan sem á enska félagið hefur hins vegar jafnan stutt vel við bakið á knattspyrnustjóranum Sir Alex Ferguson og áður en kauptilboðið í Ronaldo barst var talið að Skotinn myndi fá um 25 milljónir punda til þess að kaupa nýja leikmenn í sumar. Hversu mikinn hluta af 80 milljónunum mun Ferguson svo fá til leikmannakaupa, er alls óvíst.