Norðmenn með svínaflensusmit á batavegi

Tvö svínaflensusmit hafa greinst í Noregi. Norsk heilbrigðisyfirvöld staðfestu þetta í gærkvöldi. Karl og kona á þrítugsaldri búsett í Ósló greindust með flensuna. Þau voru bæði nýkomin heim frá Mexíkó þar sem flensan greindist fyrst og fjölmargir hafa sýkst og látist af völdum hennar. Bæði konan og maðurinn munu á batavegi og þurfti ekki að leggja þau inn á sjúkrahús en þau hafi bæði hafa sýnt væg einkenni flensunnar.

Þetta eru ekki fyrstu svínaflensutilfellin á Norðurlöndunum. Kona greindist með flensuna í Danmörku og kona í Svíþjóð. Þær höfðu báðar verið í Bandaríkjunum þar sem fjölmörg tilfelli af flensunni hafa greinst og þrír látist af völdum hennar.

Staðfest er að fleiri en 4200 manns hafa smitast af flensunni í 30 löndum. Fimmtíu og þrír hafa látist í Mexíkó, Bandaríkjunum, Kanada og Kosta Ríka.

Sérfræðingar segja flensuna nú hafa færst yfir á suðurhvel jarðar en smit hafa nú greinst í fyrsta sinn í Ástralíu og Japan.

Óttast þeir að flensan muni stökkbreytast frekar á ferð sinni þar og valda meiri skaða á næsta flensutímabili.

Hafa ber þó í huga að um þriðjungur mannkyns smitast af inflúensu á hverju ári og á bilinu 250 þúsund til hálf milljón manna deyr af völdum hennar.