Handtóku sex og tíu ára drengi í skólanum

Mál tveggja franskra drengja, sex og tíu ára, sem voru handteknir og yfirheyrðir af lögreglu hefur vakið mikla reiði í Frakklandi. Það voru hvorki meira né minna en sex lögregluþjónar sem mættu í skóla drengjanna í Floirac í Suðvestur-Frakklandi og handtóku þá vegna gruns um reiðhjólaþjófnað.

Í kjölfar handtökunnar voru þeir yfirheyrðir í tvær klukkustundir vegna málsins. Atvikið hefur vakið hvort tveggja óhug og reiði meðal fransks almennings en lögreglan segist alfarið hafa fylgt reglum. Yngri drengurinn viðurkenndi að hafa stolið hjóli en móðir hans var boðuð til að vera viðstödd yfirheyrsluna.

Skólastjóri drengjanna segir það fáránleg vinnubrögð að ræða ekki við fjölskyldur þeirra í stað þess að bíða fyrir utan skólann þar til 200 börn komu út og handtaka piltana fyrir framan öll skólasystkini þeirra. Málið þykir alvarlegt og hefur Xavier Darcos menntamálaráðherra fyrirskipað opinbera rannsókn til að komast til botns í því hvort háttsemi lögreglunnar hafi verið forsvaranleg í málinu.