Moyes ætlar að eyða Lescott-peningunum

Knattspyrnustjórinn David Moyes hjá Everton hefur gefið það út að hann vonist til þess að fá í það minnsta fjóra nýja leikmenn til félagsins áður en félagsskiptaglugganum lokar 1. september næstkomandi.

Everton seldi sem kunnugt er varnarmanninn Joleon Lescott á 24 milljónir punda og Moyes ætlar nú að stinga sér aftur á leikmannamarkaðinn með báðar hendur fullar fjár og vonast til þess að ganga betur nú en fyrr í sumar þegar lítið var að gerast hjá honum.

Everton fékk reyndar rússneska vængmanninn Diniyar Bilyaletdinov en fram að því hafði knattspyrnustjórinn skoski fyrst og fremst einbeitt sér að því að halda núverandi leikmannahópi sínum áfram á Goodison Park.

„Ég vonast til þess að geta tilkynnt um nýja leikmenn til Everton á allra næstu dögum. Takmarkið hjá okkur er eins og alltaf að reyna að stykja leikmannahópinn frá ári til árs og það er það sem við erum að reyna að gera núna," segir Moyes í viðtali við opinbera heimasíðu Everton.