Reyndu að brjótast inn í þinghúsið

27. ágúst 2009 12:18

Frá mótmælunum við þinghúsið. Mynd/Baldur

Hópur fólks klauf sig út úr hópi mótmælenda sem nú mótmæla fyrir utan Alþingishúsið og reyndi að brjóta sér leið inn í þinghúsið. Tveir lögreglumenn sem stóðu fyrir utan vörnuðu fólkinu inngöngu. Ekki kom til neinna átaka en bumbusláttur og flaut glumdi inni í þinghúsinu þegar fólkið reyndi að troða sér inn í anddyrið.

Á þriðja hundrað mótmælenda eru saman komnir á Austurvelli en mótmæli vegna Icesave samkomulagsins hófust í hádeginu. Að sögn fréttamanns sem er á staðnum er gríðarlegur hávaði við þinghúsið. Forsvarsmenn mótmælanna hvöttu í auglýsingum í dagblöðunum í dag þátttakendur til að framkvæma eins mikinn hávaða og þeir gætu.

„Hugmyndin er sú að sá sem mætir þarna og öskrar getur unnið sér inn eina til tvær milljónir," sagði Frosti Sigurjónsson, framkvæmdastjóri Dohop flugleitarvélarinnar og bloggari, í samtali við fréttastofu í gær. Hann tilheyrir hópi bloggara sem stendur fyrir hávaðamótmælunum í dag.

Tengdar fréttir

Icesave líklega samþykkt í dag

Árni Þór Sigurðsson, fulltrúi VG í fjárlaganefnd, telur allt eins líklegt að frumvarp um ríkisábyrgð vegna Icesave verði samþykkt á Alþingi í dag.

27. ágúst 2009 09:55

Bloggarar standa fyrir hávaðamótmælum á morgun

„Hugmyndin er sú að sá sem mætir þarna og öskrar getur unnið sér inn eina til tvær milljónir," segir Frosti Sigurjónsson, framkvæmdastjóri Dohop flugleitarvélarinnar og bloggari.

26. ágúst 2009 12:13

Mikið breytt eftir umfjöllun fjárlaganefndar

Verulegar breytingar hafa verið gerðar á frumvarpi um ríkisábyrgð vegna Icesave í meðförum fjárlaganefndar. Þetta segir Guðbjartur Hannesson, formaður fjárlaganefndar. Hann mælti fyrir nefndaráliti meirihlutans þegar þriðja og lokaumræða frumvarpsins hófst í dag. Kristján Þór Júlíusson, þingmaður Sjálfstæðisflokksins og fulltrúi flokksins í fjárlaganefnd, sagði ríkisstjórnina hafa orðið afturreka með upphaflega samkomulagið við Breta og Hollendinga.

27. ágúst 2009 11:05