Innlent

Allir nema Árni hafa skráð hagsmunatengsl sín

Magnús Már Guðmundsson skrifar
Árni Johnsen, þingmaður Sjálfstæðisflokksins.
Árni Johnsen, þingmaður Sjálfstæðisflokksins. Mynd/Pjetur
Allir þingmenn Alþingis fyrir utan Árna Johnsen hafa lokið við skráningu á fjárhagslegum hagsmunum sínum hjá skrifstofu forseta Alþingis. Bjarni Benediktsson, formaður Sjálfstæðisflokksins, upplýsti um hagsmunatengsl sín í gær en á miðvikudaginn í síðustu viku höfðu þeir tveir ekki lokið við að skrá upplýsingarnar.

Forsætisnefnd Alþingis samþykkti í mars reglur um skráningu á fjárhagslegum hagsmunum alþingismanna og trúnaðarstörfum þeirra utan þings. Reglurnar tóku gildi 1. maí en þingmenn ákveða sjálfir hvort þeir upplýsi um hagsmuni sína. Þeir höfðu frest til 15. júní til að skrá upplýsingarnar en þær þarf að skrá í sérstaka tölvu á Alþingi.

Eina sem Bjarni tilgreinir um hagsmuni sína og reglunar ná ekki til er seta í skipulagsnefnd Garðabæjar. Ekki kemur fram hvað hann þiggur fyrir nefndarstörfin.

Árni sagðist í samtali við Fréttablaðið 18. júní ekki hafa neitt að fela. Ástæða þess að hann hafi ekki skráð fjárhagslega hagsmuni sína á vef Alþingis sé sú að hann hafi „bara enga hagsmuni að skrá og aldrei haft."


Tengdar fréttir

Ráðherra á milljónahlut í Byr

Árni Páll Árnason, félags- og tryggingamálaráðherra, er hluthafi í Byr en hlutur hans samkvæmt stofnfjáreign er 5,6 milljónir króna. Þetta kemur fram þegar rýnt er í upplýsingar um hagsmunatengsl þingmanna. Hefð virðist hafa myndast fyrir því að ráðherrar sem heita Árni eigi hlut í Byr því nafni hans Mathiesen, fyrrverandi fjármálaráðherra, á einnig hlut í sparisjóðnum.

Árni og Bjarni hunsa reglur

Þingmennirnir Árni Johnsen og Bjarni Benediktsson úr Sjálfstæðisflokki höfðu í gærkvöldi ekki skráð fjárhagslega hagsmuni sína hjá skrifstofu forseta Alþingis, né útskýrt þar hvers vegna þeir gera það ekki. Frestur til skráningar rann út í fyrradag, en núverandi þingmenn hafa haft rúman mánuð til að skila upplýsingunum.

Árni hefur ekkert að fela

Árni Johnsen, þingmaður Sjálfstæðisflokks, segist ekkert hafa að fela. Ástæða þess að hann hafi ekki skráð fjárhags­lega hagsmuni sína á vef Alþingis sé sú að hann hafi „bara enga hagsmuni að skrá og aldrei haft“.

17 þingmenn hafa frest út daginn

17 þingmenn hafa frest út daginn til að upplýsa um fjárhagslega hagsmuni sína og trúnaðarstörf utan þings. Þar á meðal eru tveir ráðherrar Vinstri grænna og níu þingmenn Sjálfstæðisflokksins. Á fimmtudaginn höfðu 28 þingmenn af 63 upplýst um hagsmunatengsl sín en síðan hafa 18 þingmenn skráð upplýsingarnar.

27 þingmenn hafa upplýst um hagsmunatengsl sín

27 af 63 þingmönnum hafa upplýst um fjárhagslega hagsmuni sína og trúnaðarstörf utan þings. Þar á meðal eru allir þingmenn Framsóknarflokksins og fimm ráðherrar.

Mest lesið


Fleiri fréttir

Sjá meira


×

Mest lesið