Umfjöllun: Jafntefli í veðurofsa

Fylkir og FH skildu í dag jöfn, 1-1, í lokaumferð Pepsi-deildar karla í einkennilegum leik í Árbænum í dag.

Kjartan Ágúst Breiðdal skoraði mark Fylkis á fimmtándu mínútu leiksins en Atli Guðnason jafnaði metin á 34. mínútu. Ekkert var svo skorað í síðari hálfleik.

Eins og víða á höfuðborgarsvæðinu var leikurinn heldur skrautlegur vegna veðurofsans sem gekk yfir á meðan leiknum stóð. Skiptist á með slyddu, snjókomu og haglélum en sólin lét svo sem sjá sig líka. Mjög hvasst var allan leikinn.

Fylkismenn byrjuðu mun betur í leiknum og átti Ingimundur Níels Óskarsson skot í slá skömmu áður en Kjartan Ágúst skoraði mark Fylkismanna. Hann fékk góða sendingu inn fyrir vörn FH og afgreiddi knöttinn af öryggi í netið.

Ólafur Páll Snorrasson, FH-ingur og fyrrum leikmaður Fylkis, hafði reyndar einnig fengið gott færi þegar hann var að sleppa í gegnum vörn Fylkis. Ólafur Þór Gunnarsson sá þó við honum.

Um miðbik hálfleiksins fóru Íslandsmeistararnir að taka völdin í leiknum og áttu FH-ingar skot í stöng og slá með stuttu millibili. En Fylkisvörninni tókst ekki að stöðva glæsilegt þríhyrningsspil þeirra Atla Guðnasonar og Matthíasar Vilhjálmssonar sem lauk með því að Atli lék á Ólaf Þór og renndi boltanum í autt markið.

Leikar voru nokkuð jafnir í síðari hálfleik en það voru þó heimamenn sem gerðu sig lengst af líklegri til að skora sigurmark leiksins. FH-ingar fengu þó hættulegasta færið þegar að Atli Viðar Björnsson átti skot í stöng úr erfiðri stöðu í uppbótartíma leiksins.

Annars ber að hrósa leikmönnum fyrir að hafa gert sitt allra besta til að bjóða þeim áhorfendum sem létu sig hafa það að horfa á leikinn upp á fyrirtaksskemmtun. Þetta var langt í frá versti leikur sumarsins.

Fylkir - FH 1-1

1-0 Kjartan Ágúst Breiðdal (15.)

1-1 Atli Guðnason (34.)

Fylkisvöllur. Áhorfendur: 866

Dómari: Magnús Þórisson (5)

Skot (á mark): 13-12 (4-7)

Varin skot: Ólafur 4 - Gunnar 1.

Horn: 4-5

Aukaspyrnur fengnar: 16-12

Rangstöður: 8-3

Fylkir (4-3-3):

Ólafur Þór Gunnarsson 7

Davíð Þór Ásbjörnsson 6

Kristján Valdimarsson 7

Einar Pétursson 6

Tómas Þorsteinsson 6

Ólafur Ingi Stígsson 6

(90. Ásgeir Örn Arnþórsson -)

Ásgeir Börkur Ásgeirsson 5

Andrés Már Jóhannesson 7 - maður leiksins

Ingimundur Níels Óskarsson 5

Kjartan Ágúst Breiðdal 7

(87. Kjartan Andri Baldvinsson -)

Pape Mamadou Faye 5

(60. Jóhann Þórhallsson 5)

FH (4-3-3):

Gunnar Sigurðsson 6

Pétur Viðarsson 6

(90. Brynjar Benediktsson -)

Dennis Siim 6

Tommy Nielsen 6

Hjörtur Logi Valgarðsson 7

Davíð Þór Viðarsson 6

Tryggvi Guðmundsson 6

(78. Björn Daníel Sverrisson -)

Matthías Vilhjálmsson 7

Ólafur Páll Snorrason 5

(78. Alexander Toft Söderlund -)

Atli Guðnason 7

Atli Viðar Björnsson 5

Smelltu hér til að opna Boltavaktina og lesa lýsingu leiksins: Fylkir - FH.