Ólafur Ingi: Skrýtin tilfinning

Ólafur Ingi Stígsson, fyrirliði Fylkis, sagði það skrýtna tilfinningu að hafa lokið sínum síðasta knattspyrnuleik á ferlinum. Hann lagði skóna á hilluna eftir 1-1 jafntefli Fylkis gegn FH í dag.

„Ég veit ekki hvað ég á að segja. Þetta er mjög skrýtin tilfinning," sagði Ólafur Ingi. „En þetta var skemmtilegur leikur þó svo að veðrið hafi verið furðulegt. En við áttum að vinna þennan leik, þá hefði þetta verið ennþá skemmtilegra."

„Þetta er samt búið að vera frábært sumar og ég er mjög stoltur af liðinu."

Hann segir ánægður með að hafa ákveðið að taka eitt tímabil til viðbótar. „Ég sé ekki eftir þeirri ákvörðun. Þetta er búið að vera meiriháttar gaman og þjálfararnir, Óli Þórðar og Palli Einars, búnir að vera frábærir."

„Ég hef fulla trú á því að við munum geta bætt árangur okkar næsta sumar. Ég á von á því að við munum halda öllum okkar leikmönnum nema þá að ég hætti. En liðið mun vafalaust styrkja sig eitthvað líka."