Björn Bjarnason: Sakar ráðherra um að fjarstýra árásum gegn lögreglu

Björn Bjarnason, fyrrum dómsmálaráðherra Sjálfstæðisflokksins, sakar Álfheiði Ingadóttur um að hafa fjarstýrt mótmælendum í búsáhaldabyltingunni gegnum síma í glugga þinghússins. Á bloggi sínu ritar hann:

„Það bar tilætlaðan árangur," sagði Álfheiður Ingadóttir, heilbrigðisráðherra, á Alþingi 14. desember, þegar hún lýsti þátttöku sinni í „friðsamlegum mótmælum", þar sem hún öskraði hvatningarorð til þeirra, sem réðust á lögregustöðina í Reykjavík, og stóð síðan með síma í glugga þinghússins og leiðbeindi þeim, sem réðust gegn lögreglunni."

Tilefni bloggfærslu Björns var ræða Álfheiðar í dag þar sem hún svaraði fyrirspurn Gunnars Braga Sveinssonar, þingflokksformanns Framsóknarflokksins, sem spurði Álfheiði út í málið á þingfundi í dag.

Hann vildi að Álfheiður bæði lögreglumenn afsökunar á ummælum sínum þar sem hún gaf í skyn að lögregla færi fram með of miklu harðræði og væri að hefna sín á mótmælendum. Lögreglumenn hafi orðið fyrir aðkasti og þeim veittir áverkar.

Hún sagðist ekki sjá ástæðu til þess að biðjast afsökunar.

Björn segir í lok færslunnar: „Árangurinn" er sá, að Álfheiður situr illu heilli í ríkisstjórn Íslands. Spyrja má: Hvenær verður botninum náð?"

Færslu Björns má lesa hér.