Þykir á stundum grunnhygginn

Afríska þjóðarráðið vann öruggan sigur í þingkosningum sem fram fóru í Suður-Afríku í gær. Næsti forseti landsins þykir á stundum grunnhygginn.

Búið er að telja áttatíu prósent atkvæða í Suður Afríku og hefur Þjóðarráðið fengið sextíu og fjögur prósent þeirra.

Jafnvel er búist við að það forskot aukist þegar tölur berast frá afskekktari héruðum.

Enn er þó óljóst hvort ráðið fær tvo þriðju þingsæta eins og það hafði. Með slíkum meirihluta getur það breytt stjórnarskránni upp á sitt eindæmi.

Klofningsframboð hins nýja flokks The Congress of the People eða Þing þjóðarinnar náði ekki þeim árangri sem vonast hafði verið til og er aðeins með um átta prósent atkvæða.

Það er því nokkuð ljóst að Jacob Zuma verður næsti forseti Suður-Afríku. Menn hafa á því nokkuð misjafnar skoðanir.

Zuma hefur mátt sæta langvarandi rannsóknum vegna meintrar spillingar og þykir á stundum grunnhygginn.

Zuma er mikið upp á kvenhöndina og mönnum brá dálítið þegar hann sagði að hann hefði ekki áhyggjur af að smitast af alnæmi þar sem hann færi í sturtu á eftir.