Vélmenni í japanskar kennslustofur

Saya er enginn venjulegur kennari. Hún lýtur engum kjarasamningum og missir aldrei stjórn á skapi sínu. Henni þarf hins vegar að stinga í samband.

Saya er japanskt vélmenni sem lítur út svona í áttina að því sem kvenmaður lítur út. Hún starfaði áður sem móttökustjóri hátæknifyrirtækis en hefur nú söðlað um og lagt fyrir sig kennslu. Ekki er þó ætlunin að Saya leysi aðra kennara af hólmi. Henni er ætlað að kenna börnunum um tölvur og tækni, svona í miklum grundvallaratriðum alla vega.

Hiroshi Kobayashi, prófessor við Tækniháskólann í Tókýó, smíðaði Sayu. Hann segir henni þvert á móti ætlað að taka við af lifandi kennurum heldur sé henni ætlað afmarkað hlutverk auk þess sem hún geti nýst við afleysingar. Tæknikennari við Kudan-barnaskólann er ekkert yfir sig hrifinn og segir nýja kennarann eiga langt í land með að halda uppi alvöru kennslu.

Japanar eiga von á að stórauka notkun vélmenna í framtíðinni enda meðalaldur að verða svo hár í Japan að mörgum veitir ekkert af aðstoð. Þegar sinna tæplega 400.000 vélmenni alls kyns þjónustu og iðnaði í landinu en það er helmingurinn af vélmennum heimsins.