Portsmouth neitar að Shinawatra standi að baki yfirtökunni

Enska úrvalsdeildarfélagið Portsmouth sendi frá sér tilkynningu í dag þar sem sögusögnum, sem birtust í breskum fjölmiðlum í dag um að Thaksin Shinawatra væri viðriðinn yfirtöku félagsins, er staðfastlega neitað.

Shinawatra, fyrrum forsætisráðherra Tælands, var sem kunnugt er fyrrum eigandi Manchester City en seldi félagið þegar hann var dæmdur fyrir stórfelldan fjárdrátt og skattsvik í heimalandi sínu.

Bresk dagblöð vildu sem sagt meina að yfirtökukauptilboð Sulaiman Al-Fahim upp á 60 milljónir punda sem var samþykkt á dögunum væri að hluta til fjármagnað af Shinawatra.

„Í framhaldi af villandi fullyrðingum í fjölmiðlum viljum við koma því á hreint að Thaksin Shinawatra er ekki viðriðinn yfirtöku Portsmouth á neinn hátt. Ekki heldur Pairoj Piempongsat ráðgjafi hans. Al-Fahim hefur sýnt fram á að hann einn stendur að yfirtökunni og ætlar að taka sæti stjórnarformanns hjá félaginu þegar henni er lokið," segir í tilkynningu frá Portsmouth.

Landsliðsfyrirliðinn Hermann Hreiðarsson leikur með Portsmouth en hann ætlar ekki að taka ákvörðun um framtíð sína hjá félaginu fyrr en yfirtökunni er lokið og nýr knattspyrnustjóri verður ráðinn.