Redknapp útilokar sölu á Pavlyuchenko

Knattspyrnustjórinn Harry Redknapp hjá Tottenham hefur þverneitað þeim sögusögnum um að framherjinn Roman Pavlyuchenko sé á förum frá félaginu en rússneki landsliðsmaðurinn virðist nú vera fjórði í goggunarröðinni, á eftir Jermain Defoe, Robbie Keane og Peter Crouch, um framherjastöðu á White Hart Lane.

Pavlyuchenko hefur sjálfur líst því yfir að hann sé ósáttur með að fá ekki að spila meira og hann var nýlega orðaður við 10 milljón punda félagsskipti til Spartak frá Moskvu eða Zenit frá Pétursborg.

„Ég hef ekki hugmynd um hvað við borguðum fyrir hann á sínum tíma en hann er ekki á förum frá félaginu núna og hvað þá fyrir 10 milljónir punda. Hann er ánægður í London og hefur tjáð mér að hann vilji ekki fara og ég er því sannfærður um að hann verði áfram hjá félaginu til að berjast fyrir sæti sínum í liðinu," sagði Redknapp á blaðamannafundi í morgun.