Mascherano heitur fyrir Spáni

Javier Mascherano virðist vera farinn að gera hosur sínar grænar fyrir stórliðunum Barcelona og Real Madrid. Orðaði einn fjölmiðill það þannig í morgun að hann væri orðinn tilbúinn í að vera vatnsberi fyrir Lionel Messi.

Mascherano hefur viðurkennt að það gleðji hann að heyra af áhuga spænsku stórliðanna á sér. Hann hefur þráfaldlega verið orðaður við bæði félög og tengja menn það þeirri staðreynd að eiginkonu hans hefur ekki gengið vel að aðlagast lífinu á Englandi.

„Ég er afar stoltur og þakklátur að heyra af áhuga beggja þessara frábæru félaga á mér. Það er gott fyrir mig að vita af áhuga þessara liða á mér," sagði Mascherani við Don Balon.

„Bæði lið eru afar mikilvæg en í augnablikinu held ég að Barcelona sé aðeins betra lið og þes vegna vann Barca alla titlana á síðustu leiktíð," sagði Mascherano.

Einhver blöð héldu því fram í morgun að Liverpool gæti þurft að tvöfalda laun miðjumannsins til þess að halda honum.