Arbeloa gælir við endurkomu í spænska boltann

Enska úrvalsdeildarfélagið Liverpool er talið vera á lokastigi við að ganga frá félagsskiptum hægri bakvarðarins Glen Johnson frá Portsmouth á 18 milljónir punda en með kaupunum er næsta víst að hægri bakvörðurinn Alvaro Arbeloa yfirgefi Anfield-leikvanginn.

„Ég er ánægður hjá Liverpool en ég hef alltaf sagt að ég hafi enn mikið að sanna á Spáni. Mér fannst ég ekki sýna almennilega hvað ég get á meðan ég var þar og ég er sannfærður um að snúa aftur og spila á Spáni í framtíðinni," segir Arbeloa sem hefur meðal annars verið orðaður við Real Madrid á síðustu vikum.

„Það er alltaf gaman að vera orðaður við stórlið eins og Real Madrid og það sýnir bara að maður sé að gera eitthvað rétt. Ég á enn eitt ár eftir af samningi mínum við Liverpool en maður veit aldrei. Ef Liverpool fær kauptilboð í mig verður það örugglega skoðað vel og umboðsmaður minn mun taka þátt í þeim viðræðum," segir hinn 26 ára gamli Arbeloa í samtali við El Mundo.

Arbeloa spilaði með unglingafélagi Real Madrid á sínum tíma og á einnig leiki að baki með aðalliði og b-liði félagsins.