Fyrirhuguðum mótmælum Íran aflýst

Fyrirhuguðum mótmælum í Teheran í Íran sem fram áttu að fara í dag hefur verið aflýst. Írönsk stjórnvöld lýstu því yfir að forsetaframbjóðandinn Mirhossein Mousavi yrði gerður ábyrgur fyrir mótmælunum.

Það voru stuðningsmenn hans sem boðuðu til mótmælanna vegna framkvæmd kosninganna sem fram fóru á föstudaginn. Vaxandi ólgu virðist gæta meðal landsmanna en öruggur sigur forsetans í fyrstu umferð kom mörgum á óvart sem höfðu búist við jafnari keppni.

Mousavi hefur krafist þess að kosningin verði ógilt og að kosið verði að nýju og hefur hann ýjað að því að yfirvöld hafi haft rangt við til þess að halda Ahmadinejad í embætti.